Shillong, Rymphang 24 : U Myntri Rangbah ka Jylla Conrad K Sangma ha ka sngi Nyngkong, ula kular ia ka Iingdorbar Thaw Ain, ba un pynsted noh ia ki kam ba iadei bad ka jingseng ia ka Veterinary College, artylli ki Fishery College bad ka Dairy College, kaba la tyrwa nyngkong da ka Kynhun Myntri ha u snem 2022.
“Kine ki dei ki lai tylli ki College ba ngi la shim rai….namar ka jingdonkam kyrkieh haba buh ha ka jingmut jingpyrkhat ia ka jingdon bun ki nongshongshnong ka Jylla kiba trei ia ki kam ri jingri” ong u Conrad haba jubab ia ka jingkylli bala wanrah da ka kurim bad MLA ka NPP na Gambegre Mehtab Chandee A Sangma ha ka sngi Ba-ar.
U Conrad ula pyntip ba ki Veterinary Training Centre kila don ha kylleng ka Jylla Meghalaya, watla um shym la ai ia ki nombor lane ki jaka.
Haba ka Mehtab kala pynsngew ia ka jingsngewkhia halor ka jingduna ki nongtrei ha kine ki Training Centre, u Myntri Rangbah ula ong “Ka dei ka kam kaba sngewkhia shisha….ngi la shim ia ka sienjam ban pynthikna ha kaban thung briew noh kham kloi”.
“Kane ka dei ka kam kaba sngewkhia shisha bad ngin pynthikna ba baroh ki kam ba lait thylli, yn sa pyndap noh kham kloi kat kaba lah” ula bynrap.
Halor ka jingslem ban pyndep ia ki kam ba iadei bad ka jingpynkhreh ia ki detailed project report (DPR), u Conrad ula ong “Ka shimpor shisha namar jong ki kam ban ithuh ia ki jaka…bad ban pyndep ia ki jingdonkam bapher bapher”.
“Ngi don jingeh ruh namar ka jingdonkam pisa ka long kaba bun. Ngi donkam T.334 klur ban seng ia ka Veterinary College…800 acre ka jaka lah dep ban ithuh ha Kyrdemkulai, Ri-Bhoi” ula ong haba bynrap ba kine kiei kiei baroh kila pynslem ia ka kam.
“Hynrei…yn sa shim ia ki sienjam ba donkam ban pyniaid sted noh shaid shaid ia ki kam” ula kular.
