Tura, Naitung 21 : U Deputy Commissioner ka West Garo Hills, ula pyntip ba u Myntri Rangbah ka Jylla Conrad K Sangma un sa hiar sha Tura ha ka 24 tarik Naitung ban iakynduh ia ki Sengbhalang bad ki nongshongshnong ka thain ha kaban iakren ia ki mat jingdawa bad ki jingsngewkhia ba ki don.
Kane kala jia ruh namar ka jingiashah jingitkhlem pud jong ka ACHIK hakhmat ka Mini-Secretariat ha Tura, ba dawa ia ka Winter Capital ha Tura nalor ban pyntreikam ia ka backlog policy jong ka Roster System ne ka roster system naduh ki snem bala leit noh.
U Deputy Commissioner ula phah ia ka jingpyntip sha baroh ki Sengbhalang bad ki kynhun bapher bapher ba u Myntri Rangbah yn sa iakynduh ia ki ha ka por 1:30 haduh 3 baje janmiet jong ka 24 tarik ha Conference Hall jong ka Tura Circuit House ban iakren halor ka jingpyntreikam ia ka Roster System bad ka jingdawa Winter Capital.
U Deputy Commissioner ula kyntu ia baroh ki kynhun kiba kwah ban wan sha ka jingialang ba kin poi ha ka Circuit House hashuwa ka 1 baje janmiet bad ban pynrung kyrteng ialade.
Pule ruh: Leit tynruh biang ka FPWD ia ka Sorkar ban pyntreikam iaki hok jong ki briew ba duna dkhot met
