Shillong, Nailar 09 : U Myntri Rangbah ka Jylla Conrad K Sangma ha ka sngi Balang, ula pyntip ba u Myntri Rangbah Duh ka Ri Narendra Modi ula kular ban sa shong bishar hi dalade ia ka kam ba iadei bad ka Inner Line Permit (ILP), ban pynrung ia ka ktien Khasi bad Garo ha ka khyrnit ba phra bad kiwei kiwei ki kam bala pynsngew da ka kynhun na Jylla.
Haba iakren bad ki nongthoh khubor u Conrad ula ong “Ngi la iakren bad pyntip sha u halor ka jingiakren kaba iaid halor ka kam pynbeit pud bad u Myntri Rangbah ula pynpaw ia ka jingsngewkhia halor ki jingjia bapher bapher kiba iai jia bad balei ba hapoh ka Ri ym lah ban pynbeit noh ia kane ka kam”.
U pyntip ba “U Myntri Rangbah Duh ula iaroh ia ki Nongialam jong ka thain Shatei Lam Mihngi halor ka jingshim ia ki sienjam ban pynbeit bad pynpaw ba kine ki dei ki jingeh ba khraw bha hynrei watla katta ki nongialam jong ki Jylla bapher bapher kila rah iakren ia kane ka kam. Ula pynpaw ia ka jingkmen halor kane bad kular ba un ai ka jingkyrshan ba pura na ka liang ka Sorkar”.
Halor ka jingiakren iasuk bad ka HNLC, u Myntri Rangbah Duh u kwah eh ba kan don ka jingsuk ba neh shirta ha ka Jylla Meghalaya bad kyntu ia ka Sorkar Jylla ba kan jam shakhmat ha kane ka kam bad ban pyrshang ban pynbeit noh kham kloi ia ki kam ki jam baroh.
U Conrad ula iathuh ba ka kynhun ba u ialam na Jylla, kala pynsngew ruh hakhmat u Myntri Rangbah Duh ia ka jingangnud jong ki nongshongshnong ka Jylla ban pynrung noh ia ka Ktien Khasi bad Garo ha ka khyrnit ba phra jong ka Riti Synshar ka Ri.
Halor ka jingdawa ILP, u MYntri Rangbah ka Jylla u pyntip ba ka kynun kala pynpaw hakhmat u Myntri Rangbah ka Jylla ia ka jingangnud jong ki paidbah ka Jylla ban don ia ki kynja ain hapoh ka Jylla ki ban iada ia ka bha ka miat bad ki jingmyntoi jong ki nongshongshong ka Jylla bad kumta, la pynpaw ba ka ILP ka dei kawei na ki lynti kaba ka Jylla ka lah ban leh.
“Ngi la pyrshang lyngba ka MRSSA ruh. Ngi la batai ha u halor ka MRSSA ruh bad ula shah skhor bha ia ngi bad u sngewthuh ia ka jingsngewkhia jong ki paidbah ka thain Shatei Lam MIhngi bad ula ong ruh ba un sa shong bishar ia kane ka kam bad ba un sa aiktien sha ka Sorkar Jylla nalor ba un sa iakren ruh bad ka Home Ministry” ula bynrap.
