Shillong, Naitung 04: U Myntri Rangbah ka Jylla Conrad Kongkal Sangma hynne ka sngi nyngkong, ula ong ba ka kam ba iadei bad ka jingpyntreikam ia ka Inner Line Permit (ILP) bad ka jingpynrung ia ka ktien Khasi bad Garo ha ka Khyrnit ba phra (Eight Schedule) ka Riti Synshar ka Ri, ka la shong mynta ha ka kti jong ka Sorkar Pdeng ban shim rai.
“Ka jingpyntreikam ia ka ILP bad ka jingpynrung ia ka Ktien Khasi bad Garo ha ka khyrnit ba phra kala don shabar ka bor treikam jong ka Sorkar Jylla” ong u Conrad haba iakren bad ki nongthoh khubor.
U Myntri Rangbah ula kren ia kane halor ka jingmih iakhih jong ka Kynhun Sengbhalang hakhmat ka Secretariat hynne ka sngi.
“Ka Sorkar Meghalaya Democratic Alliance (MDA) ka dei kaba la shimkhia tam haba iadei bad ka jingdawa ILP, jingpynrung ia ki Ktien Khasi bad Garo bad ka jingpynbeit khappud bad ka Sorkar Assam” ula ong.
U Conrad ula ong ba kine ki kam kim shym la iaid satia shano shano ruh ha kine ki 50 snem tad hadien ka jingshimti ka Sorkar MDA ba kane ka Sorkar kala nud ban shim ia ka rai ba tyngeh kata ban mynjur ia ka Resolution ha IIngdorbar Thaw Ain ban pyntreikam ia ka ILP bad ban pynrung ia ka Ktien Khasi bad Garo ha ka khyrnit ba phra.
U Myntri Rangbah ula pyntip ruh ba shibun ki kam ki la iaid ha kane ka jingshim rai bad ong “Ngi la pyni ia ka jingsngew jong ngi ban pynpawnam bad ban pynriewspah ia la ka jong ka ktien ka thylliej”.
“Hynrei haba kut ka sngi kumba nga ong la ka dei ka Khyrnit ba phra lane ka ILP, kine ki dei ki kam ba donkam ban hap iai tynruh, donkam ban pynkohnguh bad don ruh ki kam ba long shabar ka bor treikam jong ka Sorkar Jylla” ula ong haba bynrap “Ngi la pyndep iala ka jong ka bynta da kaba mynjur ia ki Resolution ha Iingdorbar,ka bym pat ju jia mynno mynno ruh”.
U Conrad ula bynrap “Haba phai sha ka kam kajia pud, ngi dei kiba nyngkong eh kiba la leit ban jurip bad ban pyndep ia ka kylla kaba nyngkong haduh u pud ban iasoi ia ka soskular bad ka Sorkar Assam ban iapynbeit noh ia ki jingiakajia ha ki hynriew tylli ki jaka, ia kaba la soi hakhmat u Myntri kam pohiing ka ri u Amit Shah bad ki Ophisar ka Ministry”.
Haba pynpaw ba ka jingsngewkhia jong ki Sengbhalang bad ki paidbah kan iai don beit, u Myntri Rangbah ula ong ba ki paidbah hi kila iohi ia ka jingshimkhia jong kane ka Sorkar halor kine ki kam. “Nga tharai ki paidbah kin sa bishar bad ki paidbah ki tip ruh ba kumno ngi la pyniaid ia kine ki lai tylli ki kam kiba ngi la buh hakhmat eh” ula ong.
Shuwa kane, ka seng Hynniewtrep Achik National Movement (HANM) kala pynlong ia ka jingiakhih hakhmat ka Secretariat hynne ka sngi ban pyrshah ia ka jingpynslem jong ka Sorkar ban pyntreikam ia ki mat jingdawa jong u paidbah ka Jylla bad ka jingbym lah ban pynbeit ia ka jingeh jong ki Nonghikai.
U President ka HANM Bah Lamphrang Kharbani ula pynrem ia ka sorkar jylla halor ka jingpynbor ia ki Nonghikai ban thiah miet la bad sngi ha surok.
“Ngi dawa ia ka Sorkar MDA ba kam dei ban ialehkai bad ka lawei jong ki Khynnah skul. Ngi donkam ba ki nonghikai kin leit phai noh sha la ki skul. Pyntreikam noh mardor ia ki jingdawa jong ki” ula ong haba maham “Mynta ka dei tang ka jingsdang hynrei lada ka sorkar kam leh eiei noh, kan pynbor ia ngi ban mih sha surok kam pher la kan pynthut ia ka shongsuk shongsain”.
Une u Nongialam ka HANM ula ong ba ka seng ka dawa ruh ia ka Sorkar ban pyntreikam noh mardor ia ka ILP, pynrung noh ia ka Ktien Khasi bad Garo, pynkynriah noh ia ki Harijan na Them Metor bad ban pynbeit noh ia ki jingiakajia khappud bad ka Assam khlem da iapein ia ki jaka ki trai ri trai muluk hashuwa u snem 2023.
