Shillong, Naitung 18 : Ka National People’s Party (NPP) kala ther tyngeh ia ka Naga People’s Front (NPF) haba kynnoh ba iai bteng ban khring tuh ia ki nongmihkhmat ka NPP bala jied da ki paidbah ha Nagaland lyngba ki buit ki bym iahap bad ka riti synshar paidbah.
Ha ka kyrwoh, u National Working President ka NPP James K Sangma ula ong ba ka jingpynrung ia ki arngut ki Municipal Councillors ka NPP na Kohima sha ka NPF ka dei ka sien kaba ar ba kum kine ki jingjia kila dang dang shen,
Shuwa kane, arngut ki Councillors ka NPP na Dimapur kila kynthih diengkper.
Kat kum ka jingong ka party, ka jingphet seng kawei hadien kawei ka pyni ia ka “jingleh khang” ha ka jaka ka jingiakhih sain pyrthei ba ju jia man ka por.
Ka NPP ka ong ba ki elekshon bad ka synshar khadar ka dei ban hap iakhun halor ki nongrim bad ka jingshakri ia u paidbah, ym ban “pyntroin ia kiwei ki party lyngba ka jingkhring briew ba da buh thong”.
Ka party kala pynpaw ia ka jingsngewkhia halor ka jingkynnoh ia ka rukom leh kaba lam sha kane ka jingphet seng.
Ka kam ba kala ioh ia ka kaiphd ba la pynbor ia ki Councillors da ki jingbyrngem ba kin duh ia ki song pisa kam pynroi bad ki skhim ka Sorkar lada kim iasoh sha ka party kaba synshar.
“Lada dei kaba shisha, kane ka dei ka jingpyndonkam bakla ia ka bor synshar” ong ka NPP.
“Ka roi ka par ka dei ka hok jong ki paidbah bad ba ym dei ban pynlong kum ka atiar ban pynbor lane pyntieng pynsmiej ha ka sain pyrthei. Haba pyniasoh ia ka pisa u paidbah bad ka jingieid party, ka riti synshar paidbah hi kala duh noh”.
Wat hapdeng kane ka jingjia, ka NPP ka pynpaw ba ka iai bat ia ka jingiadei ba iajan bad ka NPF bad kiwei ki seng riewlum bad ki national party.
Ban jam shakhmat, ka NPP ka ong ba kan sa shong bishar ia ka jinglong jingman ha Nagaland bad kan sa shim ia ki sienjam ban pynkhlain ia ka seng ha kane ka Jylla.
