Shillong, Nailur 14: U Myntri Rangbah ka Jylla Conrad Kongkal Sangma ula pyntip hapoh ka Iingdorbar ba ka Sorkar kala pynlong haduh 28 tylli ki jingialang, 18 sien ki jingjurip ia ki shnong ba iakajia bad jan 4 tylli ki jingialang shisngi la pynlong ha ka wat ba nyngkong jong ka jingiapynbeit pud.
U Myntri Rangbah ula pyntip ia kane haba jubab hapoh ka kynta kylli jingkylli kaba la pynmih ruh ia ka thma ktien kaba thnem bha bad u MLA ka North Shillong Bah Adelbert Nongrum.
U MLA ka Nongpoh Bah Mayralborn Syiem ula buh jingkylli ia ka Sorkar la ka don ne em ka jingpyrshang ban khyllie bad shong bishar biang ia ka MoU bad ban pyrshang pynioh biang ia ki katto katne ki shnong kiba la leit sha Assam.
U Myntri Rangbah sa shisien ula pynkynmaw ia ka Iing ba ka jingkylli ban khyllie bad shong bishar biang ia ka MoU kam don shuh. Halor ki shnong bala kdew da u Dkhot, u Myntri Rangbah ula ong ba bun na kine ki shnong kila wan sha Meghalaya mynta.
Hynrei ia kito ki shnong kiba la leit sha Asam la leh da ka jingkwah jong ki paidbahd ba ki artylli ki Jylla kila shim rai halor kane ka nongrim.
“Ki Shnong bala ieh kumba kdew da u MLA, ka long kaba donkam ban iakren hapoh ka Iing haba ngi ong ba ieh, kaei ka jingmut? Kiei kita ki shnong namar lada don ka jingdawa ba ki shnong ki bym don ha ka jingiakajia hynrei ki dei kiba la pynhap sha Assam bad ki bym long kat kum ka jingphiah pud jong u map 2011, kan long kaba bakla ban ong ba la shu ieh ia ki” ong u Conrad.
U Myntri Rangbah ula kdew ruh ba ka wat pynbeit pud kaba nyngkong, ka dei kaba la leh kat kum ki jingai jingmut jong ki Regional Committee.
U Myntri Rangbah ula pynpaw ba ka rai ba khatduh ki ka dei kaba la pynshong nongrim halor kiba bun ki nongrim ba kynthup ka jingkhmih ia ki kot ki sla bad ka Sixth Schedule, ki Map jong ki Hima, ki jingpynsngew u paidbah bad kiwei kiwie, ia kiba la shim na ki publid hearing kiba la pynlong.
Haba u MLA ka Nongpoh ula kylli la ka Sorkar kan pyniaid biang da kajuh ka lynti ha ka jingiapynbeit pud jong ka wat ba-ar da kaba pynshong nongrimkat kum ka kaiphod 2011 bala aiti da ka Sorkar Meghalaya sha Assam, u Conrad ula ong ba kane kam dei ka kam kaba suk kumba iapyrkhat.
“Ka long kaba jwat ia ngi ban pynshisha ia ki jingkylla…hynrei ia kaei kaba lah hi, ngin pyrshang ban iakren bad iapynbeit. Hynrei ban kdat sharud ia ka kaiphod 2011 ka long kaba eh bha” batai u Myntri Rangbah.
Kiwei kiwei ki Dkhot kiba la iashimbynta ha kane ka jingiatai ia ka mat ki kynthup ia u MLA ka Umroi bah George B Lyngdoh, u MLA ka Mawlai Bah PT Sawkmie, u bah Nujorki Sungoh, Bah Adelbert Nongrum bad kiwei kiwei.
