Shillong, Jymmang 06 : U Myntri Rangbah ka Jylla Conrad K Sangma hynne ka sngi Saitjain, ula pyntip ba jan kot 100 ngut ki samla pule lah dep ban pynmih na Manipur bad la wan ialam suk shapoh ka Jylla.
Ula ong bas a 40-50 ngut ki samla pule kila don ha lynti. Ula kular ruh ba ka Sorkar kan sa wan ialam noh ia baroh ki samla ba dang sahkut ha Manipur hapoh ka 48-72 kynta.
“Jan kot 100 ngut kila wan poi sha Jylla bad katba ngi dang iakren sa kumba 40-50 ngut kin wan poi mynta ka sngi. Phi hap ban pyrkhat ba ha Manipur, ki jaidbynriew na Meghalaya ki dei kiba don bun eh. Ngi don bun bah ki samla pule kham bun haba ianujor bad kiwei pat ki Jylla ka thain Shatei Lam Mihngi. Ta ka daw ka jingpyniaid ia ki kam ki jam ka kham shimpor” ula ong haba iakren bad ki nongthoh khubor shabar ka jingialang wan bynrap lang jong ka PDF sha ka NPP.
U Conrad ula ong ba ka Sorkar kala lah ban buh kyrpang ia ki jaka shong (book seat) ia jan baroh ki nongshongshnong ba sahkut ha Manipur. Hynrei, kumba 5-10 tylli ki seat ym shym la lah ban pynthikna hynrei u kular ban sa pynthikna noh ha kine ki 48-72 kynta ban wan.
“Ngin shimkhia ba ha kine ki 48-72 kynta ngi dei ban lah ha kaban wan ialam noh ia baroh ki samla pule jong ngi” ula pynthikna.
Ka Sorkar Meghalaya kala sdang ia ka jingpynmih iala ki jong ki Nongshongshnong khamtam ki samla pule, na Manipur naduh ka sngi Thohdieng. Haduh 66 ngut ki samla pule ka Jylla kiba pule ha ki jaka pule bapher bapher ha Imphal, kila wan poi ha Jylla ha ka miet sngi thohdieng bad la wan ialam ia ki da ka liengsuin.
Ka Sorkar Jylla kala pynkhreh ia ka liengsuin ba kyrpang bad ki bos ban wan ialam noh iala ki jong ki nongshongshnong na Manipur.
Ka kyrwoh khubor n aka Sorkar Jylla hynnin ka janmiet sngi Thohdieng kala ong ba nalor kito kiba la wan ialam da ka liengsuin, kumba 60 ngut la wan ialam noh sha Jylla da ki bos bala pynkhreh kyrpang.
