Shillong, Naitung 13: U Myntri Rangbah ka Jylla Conrad Kongkal Sangma hynne ka sngi balang, ula pyntip ba ka Iingkashari High Court kala kren shai kdar baka Sorkar Jylla kala lah ban pyniaid shakhmat ia ka jingthungkam thungjam ha Jylla hadien ka jingwanrah ia ka Roster System.
Haba kren sha ki lad pathai khubor ha Police Headquarter ha Shillong, u Myntri Rangbah ula ong ba ka jinglong jingman ha kawei pa kawei ka Tnad, ka Roster System ka long ha kawei pat ka bynta bad kaba iapher.
Ta ka daw, kam lah ban long tang kawei ka lynti ne ka jubab ia kawei pa kawei haba ong “Baroh ki Tnad kila pyndep ia ka roster bad mynta kila iaid shakhmat ha ka jingthungkam thungjam,” pyntip u Conrad.
U Myntri Rangbah u pyntip ba ia ki Tnad kiba heh, kiba donkam kham bun ki jingtip kiba dei naduh u snem 1972, kine ki tnad kila khmih ia kiba bun bah ki kot ki sla bad kila shimpor ban lum thup ia ki jingtip haka ban pynkhreh ia ka roster naka bynta ban pynthikna khatduh ia ka jingthungkam thungjam.
“Nga kwah ban kren da kaba shai sha ki paidbah bad baroh ba mynta kam don shuh kano kano ka jingwit ha ka jingthung kam thungjam. Kam don jingwit shuh ha ka kam thungkam ha ka Jylla” ula ong haba bynrap “Ka jingwit hi ka long tang kawei ka kyndon kata ba ngi dei ban don ia ka roster system”.
U Myntri Rangbah u pyntip ba ki don katto katne ki Tnad kiba la pyndep ia ka roster system bad mynta kila iaid shakhmat ha ka jingthungkam, katba katto katne ki tnad namar ba ki dei kiba heh bad kiba don da ki spah bad hajar ngut ki briew, kila don ki khep ba ki shem jingeh ban wad ia ki kot ki sla naduh u snem 1972.
U Myntri Rangbah ula kular ia ki Nongshongshnong baka Sorkar kala pyrshang kat kaba lah ban pynthikna ba baroh ki Tnad Sorkar kin wanrah noh ia ka roster system khnang ba kiei kiei baroh kin long biang kumba ju long baroh shi katta.
