Shillong, Naitrung 13 : Ka National People’s Party (NPP) ka lah ban sa sei da u President barim ka East Khasi Hillls district Congress committee Bah Kennedy Khyriem ban aireng na Mawphlang ha kane ka elekshon MLA kaban long ha u 2023.
Ia utei u rangbah uba dang shu dep iehkam dang shen na ka party Congress, ka NPP ka la pynkhreh ban pdiang burom ha ka 26 tarik mynta u bnai.
Ki nongialam ka NPP ki la iathuh ruh ba ka party ka la pynkhreh ban pdiang burom ha ka rukom kaba shongkun bha ia utei u rangbah ryngkat bad ki nongkyrshan jong u kiba mih lang na ka Congress.
Lah ban kdew hangne ba u Bah Kennedy uba la iakhun ia ka elekshon shiteng samoi na ka tiket Congress dang shen ha Mawphlang, u la ioh haduh kumba 9000 vote bad shah shah rem noh ha u kyrtong ka UDP Bah Eugene Lyngdoh.
Ka jingshah rem jong u lah ruh ban ong ba kadei na ka jingmih lang u Bah Lamphrang Blah MDC ka Congress na ka thain ban iakhun lang ha katei ka elekshon shiteng samoi na ka tiket NPP da kaba ioh ban khur haduh 5000 vote.
Ia katei ka jingwan pyniasoh jong u Bah Kennedy sha ka NPP la pyntikna ruh da u nongialam ka party na Mawphlang badei ruh u MDC ka NPP na katei ka thain.
Haba jubab pat halor ka jingkylli u la ong, “Ia mynta hi ngi dang pynkhreh ia ka jingpdiang burom bad ia ki kam kiba donkam ngin pyntyllun noh nangne shakhmat khamtam na bynta ka elekshon ha u 2023.
