Kynthoh kylla u CM ia ka AITC: Wat leh politics ia ka kam pynbeit pud bad ka Assam

Date:

Share post:

Shillong, Naitung 13: U Myntri Rangbah ka Jylla Conrad Kongkal Sangma hynne ka sngi balang, ula kyntu ia ka All India Trinamool Congress (AITC) kaba don ha ka Liang Pyrshah, ba kan kiar na ka jingleh politics iaka kam pynbeit pud haba pynmaw ba ka soskular pynbeit pud bala iasoi bad ka Assaam ka dei kaba la pynshong nongrim na ka map bad ka kaiphod u snem 2011 bala aiti hi da ka Sorkar Congres ba ialam hi da u Dr Mukul Sangma.

“Nga kyntu ia ka Liang Pyrshah (AITC) ba kine kim dei ki kam ba phi ban ban leh politics namar ki paidbah ka Jylla kila mad ia ka jingjynjar la slem bah” ong u Conrad haba iakren bad ki nongthoh khubor.

Kane ka jingkren u Myntri Rangbah kala wan kum ka jingkynthoh kaba tyngeh ia ka jingkren u Nongialam ka AITC bad Myntri Rangbah barim ka Jylla Dr Mulul Sangma uba ong ba ka AITC kan sa pynkylla biang ia ka soskular bala iasoi hapdeng ka Meghalaya bad Assam, lada ki paidbah ki jied ia ka AITC ba kan shimti ia u lakam ka jingsynshar ha u snem 2023.

“Nga hap ong ba ka long shisha kaba sngewsih ba ka AITC ka kren ia kum kane namar haba kren hok, haba kine ki Nongialam ki dang don ha ka bor haduh 8 snem, kim shym la leh eiei ia kane ka kam bad mynta ba ki kam kila iaid shakhmat, ki kwah pat ban pynkylla biang sha kaei kaba ju long ju man. Ngam lah ban sngewthuh balei ba ki don ia kum kane ka jingsngew. Nga tharai ba ki dei ban kmen bad ngi la lah ban pynbeit ia kane ka kam kaba jwat bha” ong u Conrad.

U Conrad ula ong ba u Nongialam ka Liang Pyrshah (Dr Mukul) ula kren ia ka jingsorjamin kaba thikna bad ki map jaka hynrei ki map bad ki kaiphod ki dei kiba laaiti da ka Sorkar ha u snem 2011. Namar kata, lada dei ban iajngoh ia ki map ha ka kitei ki por, la dei ruh ban iajngoh ha u snem 2011-2012.

U Conrad ula ong ba kampher lada dei ka Sorkar Congress ne NPP, ka mat hi ka long baka Sorkar Meghalaya ha u snem 2011 kala iaid lyngba ki map bad kala aiti ia ka kaiphod sha ka Assam bad ka don tang 12 tylli ki jaka kiba don hapdeng ka jingiakajia.

“Hynrei mynta kine ki juh ki briew ki ong ba ngi dei ban iajngoh biang ia kine ki map. Hato kam mut ba phi (Dr Mukul) phim shaniah iala ka jong ka kam bad ka nongrim lajong?. Ka kaiphod ka dei kaba la pynkhreh hi da ma phi (Dr Mukul) hynrei phi ong ia ngi ba ngim dei ban pdiang ia kane ka kaiphod” ula ong.

“Ka long kaba shaiong ba u Nongialam ka Liang Pyrshah u pynmih ia kum kane ka jingkynnoh namar lada u pynmih ia kane ka jingkynnoh, ka mut ruh ba u kynnoh dalade ialade. Hynrei mynta u ong ia ngi balei ba ngi pdiang bad balei ba ngi iaid ha ka nongrim jong kane ka kaiphod kaba ula aiti hi dalade sha ka Assam” ula bynrap.

Haba kynthoh jur ia une u Nongialam ka AITC ba u pyrshang ban pynlong ia kane ka kam pynbeit pud kum ka ishu elekshon, u Conrad ula ong ba kine kim dei ki kam ba ki paidbah kin pynsngew haba ong baka AITC ka dei ban kren halor ki kam pynroi bad kiwei kiwei ki ishu kiba ktah ia u paidbah.

Ka Jylla Meghalaya bad Assam kila iasoi ia ka soskular pynbeit pud ha ka 29 tarik Lber 2022 ban iapynbeit noh ia ka jingia kajia ha ki hynriew tylli ki jaka ba iakynad bad ia kane ka soskular la iasoi ruh ha Nongbah Delhi hakhmat jong u Myntri kam pohiing ka Ri u Amit Shah

Share post:

spot_img

Popular

More like this
Related

Ngam jyllop 2 ngut ki Khynnah Kynthei ha Wah Rilang

Shillong, Iaiong 22 : Arngut ki Khynnah Kynthei kiba...

Expelled and Unbowed: Avner Pariat’s defiant exit unveils party’s political turmoil

Shillong, Apr 21: Former Voice of People Party leader...

Jingshah pyniap dusmon ha Rongmil | Dawa ki kynhun na Assam bad Garo ia ka jingtohkit hok ki Pulit

Goalpara, Iaiong 21 : Ki kynhun sengbhalang na Assam...

Elekshon Lok Sabha : Sdang u Amit Shah ban ialap elekshon da ka road show ha Silchar

Guwahati, Iaiong 21 : U Myntri kam pohiing ka...