Shillong, Nailur 07: U MLA barim ka Mawsynram u bah Himalaya M Shangpliang ula pyntip ba iaka kam Adviser jong ka tnat pule puthi la tyrwa sha u da u Myntri Rangbah ka jylla Conrad K Sangma bad Symbud Myntri Rangbah ka jylla bah Prestone Tynsong.
U bah Shangpliang ula kynnoh kane kala jia hadien ba u President ka Meghalaya BJP bah Ernest Mawrie ula phah sangeh ia u Myntri sorkar bad MLA ka Pynthorumkhrah bah A.L Hek ban phah iaka shithi sha u Myntri Rangbah ka jylla ha ryngkat bad ki kyrteng jong u bah Shangpliang bad u bah M Kharkrang naka bynta ki jingai bhah kam. U bah Ernest ula kyrpad pynban ban pynrung iaka kyrteng ialade sha u Myntri Rangbah.
“Iaka kam Adviser shaka tnat pule puthi la tyrwa hi da u Myntri Rangbah ka jylla Conrad K Sangma bad u Symbud Myntri rangbah bah Prestone Tynsong. Kine baroh 2 ngut kila tyrwa ia kane ka kam sha nga bad kila ong ba ngan wan shim iaka shithi shah thungkam” iathuh u bah Shangpliang.
U bah Shangpliang ula iathuh ba ula kyrpad ia u bah Ernest ban phah ruh iaka kyrteng jong ki 4 ngut ki MLA barim bad u IPS officer barim sha u Myntri Rangbah naka bynta ki kam bapher bapher.
“Kaba pynkyndit ka long hadien ba nga la shah thung kum u Adviser, u bah Hek ula khot ia nga hynrei haka jaka ban ai khublei ula kylli kylla pynban, mano ba phah iaka kyrteng ban ioh ia kane ka kam bad nga la iathuh ba nga ioh na u Myntri Rangbah ka jylla” ula ong.
U bah Shangpliang ula ong ba u bah Hek ula iathuh ba u bah Ernest ula bthah ban nym phah iaki kyrteng jong u bah Shangpliang bad u bah Kharkrang sha u Myntri Rangbah ka jylla.
“Kaei kaba u bah Hek ula pyntip ka long kaba pynlyngoh bha. U bah Hek ula phah iaka kyrteng jong nga bad jong u bah Kharkrang naka bynta ki kam bapher bapher bad ula pyntip ruh sha u President ka Meghalaya BJP ubah Ernest hynrei u bah Ernest ula bthah ban pynsangeh shwa. U bah Ernest ula tar iaka shithi bad ula kylli ba kumno phin phah iaka kyrteng jong kine 2 ngut kiba dang iasoh shaka Party mynnin ” ula kynnoh.
