Shillong, Naitung 22 : Ka Sorkar Jylla kala aiti ia ka kaiphod hakhmat ka Iingkashari Meghalaya High Court ba pyntip ba ka jingpom ia ki dieng ba bun bah ha ka thain Lawsohtun, East Khasi Hills ka dei kaba la lehe ban pyntrei ia ka Shillong Peak Ropeway Cable Car Project da ka Tnad Tourism.
Haba shong bishar ia ka Public Interest Litigation (PIL), ka Iingkashari kala pynpaw kham hashuwa ia ka jingsngewkhia halor ka jingkynnoh bad kala thung ruh ia ka State Level Committee ban khmih ia ki kam ba iadei bad ki aplikeshan ne jingpan jingbit ban pom ne slor ia ki tnad dieng.
Ia kane ka PIL la mudui da Gerealdine G Shabong bad ka Iingkashari kham hashuwa kala bthah ia ka Sorkar Jylla ba kan aiti ia ka kaiphod halor kane ka kam.
“Ka paw na kane ka kaiphod (ka kaiphod kaba bniah bha bala aiti ha ka 18 tarik Naitung) ba ka jingpom ia ki dieng ha ka thain Lawsohtun, East Khasi Hills,ka dei kaba la leh ban pyntrei ia ka Shillong Peak Ropeway Cable Car Project ha Raid Laban Reserve Forst bad Raid Laban Forst da ka Tnad Tourism ka Sorkar Jylla, hadien bala ioh ia ki jingbit ban pom ia ki dieng na ka Sorkar Pdeng” ong ka Division Bench ba kynthup ia u Chief Justice IP Mukerji bad Justice W Diengdoh ha ka hukum ba pynmih ha ka sngi Ba-ar.
Ka Iingkashari kala shimkhia ruh ia ka kaiphod, kaba pynpaw ba ka SorkarPdeng kala ai ia ka bailutksan na ka bynta ban thungbiang ia ki dieng.
Ka Iingkashari kala buh ban shong bishar biang ia kane ka mukotduma ha ka 30 tarik Naitung, 2025 haba ailad ruh ia u nongmudui ban ai ia ka rejoinder affidavit ba iadei bad ka kaiphod ka Sorkar.
Ka Iingkashari kala bthah ruh ia ka State Level Committee ba kan kham trei smat haba khmih ia ki aplikeshon ne jingpan jingbit ban pom ne slor ia ki tnad dieng.
