SHILLONG, Jylliew 24: Ki nongrep jong ka thaiñ West Khasi Hills kila shah ktah jur bha naka jingther u lapbah lapsan ha kine ki khyndiat sngi ha ka jylla, la pyntip u Myntri Sorkar uba khmih ia ka tnad PHE Bah Renikton Lyngdoh Tongkhar uba long ruh u Chairman jongka Regional Committee ka West bad South West Khasi Hills.
“Nga la iohi da la ki jong ki khmat bad ka pynsngewsih kthang ia nga ban iohi ba ki nongrep kila shah ktah jur bha na ka jingwan lynshop ka bor mariang” ong u Bah Tongkhar hynne ka sngi, hadien ba u la leit jurip ia kylleng ki jaka kiba la shah lynshop haka bor mariang.
U la pyntip, ba bun ki pynthor kba kila shah rong ha ka um bad kane kala pynpangnud ia u namar ba ki nongrep kin ym ioh ia ka aiom ot mynta ka samoi.
U Bah Tongkhar u la ong, ba bun ki surok bad ki ïing ki sem kila shah pynjulor na ka jingther u lapbah lapsan bad u la kyntu ia ki Rangbah Shnong jong ki shnong bapher ban iarap ia ki nongrep bad ba ki paidbah kidei ban pyntip sha ki Deputy Commissioner bad ki Block Development Officer ba kin khmih bniah iaka jingshah pynjulor jong ki jaka rep, khnang ba ka sorkar jylla kan ioh ban ai jingiarap ia ki.
Une u Myntri Sorkar u la leit jurip ia ki shnong kiba don ha ka thaiñ Nongstoin, West Khasi Hills, South West Khasi Hills bad Eastern West Khasi Hills bad u la ong, ba bun ki surok kila shah pynjulor.
“Ka surok ha Rngisawlia kaba hap ha Mawthadraishan constituency bad 2-3 ki surok ha South West Khasi Hills kila twa bad kane kala pyndkoh syndon iaka leit ka wan jong ki shnong ki thaw bad wat ka surok ha shnong Ngunraw kala julor bad kala pyndkut syndon iaka leit ka wan jong ki paidbah” ong u Bah Tongkhar.
U la iathuh, ba ki tnad sorkar kila trei shitom ban pynkhreh ia ka jingkheiñ jingdiah na ka bynta ban shna noh mardor ia ki surok kiba la shah pynjulor haka bor mariang.
U Bah Tongkhar u la ong, ka sorkar jylla kan donkam ym duna ia ka T.10 Klur ban ai jingiarap ia ki spah ngut ki nongrep kiba la shah ktah ki jingthung jingtep bad ki jaka rep jaka riang na ka jingshlei um.
“Ha kaba iadei bad ka jingshna ia ki surok, ka sorkar kan hap ban pynlut kumba T.15-20 Klur na ka bynta ban shna ia ki surok ha man la ka District” ong u Bah Tongkhar.
