Shillong Nailar 10: U Nongialam ka Peoples Democratic Front (PDF) Bah Banteidor Lyngdoh u la pynpaw ba ka PDF kan pynieng hapoh 15 ngut ki kyrtong ban iakhun iaka elekshon MLA 2023 napoh rilum Khasi-Jaintia.
“Ngin pynieng tang hapoh 15 ngut ki kyrtong ha ka elekshon ban wan bad ngim kwah ban pynieng bun ngut namar ka don ka jingong, ka jingkhlain kam dei haka jingbun paid hynrei kaba kongsan ban don ia ki briew kiba don burom bad kiba don iaka nongrim” ong u Bah Banteidor Lyngdoh haba iakren bad Ka Shlem.
“Ngi dang lah ban pynieng tang 15 ngut ban jop 10 ngut ban ia kaba pynieng 60 ngut bad jop pat tang 10 ngut. Kaba kongsan hi ka long ba ngin sei ia kiba kynsai kiban ai ka jingshakri kaba paka” ula bynrap.
Ha kaba iadei bad ka jingsaphriang khubor ba ar ngut ki MLA ka PDF kin sa phet noh bad ban pyniasoh bad ka NPP, u Bah Banteidor u la ong, “Ngam lah ban ong eiei ia kata, hynrei ngi don iala ka jong ka bynta bad kaba kongsan ka long ba ngi ruh ngin sei ia ki kyrtong na ki constituency jong ki MLA kiba mut ban ryngkang noh sha kawei pat ka seng”.
U la ong, lada ki MLA ba mynta ki PDF ki mih ban leit iakhun noh na kawei pat ka seng, ki kyrtong ka PDF kiban iakhun pyrshah ia kitei ki MLA phet seng kin jop 100 naka 100 namar ba ka PDF ka don iaka nongrim kaba skhem bha.
Haba pyntip ba ma u bad u MLA ka Sohra Bah Gavin Mylliemngap kin neh beit ha ka PDF, une u MLA ba dang shu jop jong ka PDF ula ong “Ngi jop na kane ka seng, ngin burom bad ngin iai don beit ha kane ka seng”.
Kum ban shu kdew, ka PDF ka don 4 ngut ki MLA, hynrei ar ngut ki MLA ka PDF ki don ia ka jingthmu ban leit pyniasoh noh bad ka NPP-kiba kynthup ia u MLA ka Umsning Bah Jason Sawkmie Mawlong bad u MLA ka Mylliem Bah Hamletson Dohling.
