Shillong, Nailar 10: U Myntri kam Pohiing ka Jylla Bah Lahkmen Rymbui hynne ka sngi balang ula ong ba ka Sorkar Jylla kala bthah ia ki bor pahara ba kin kham pynjur ia ka jingpeitngor sha ka jingrakhe ia ka Sngi Laitluid ka Ri (Independence Day) namar ka jingkylla ktem lehnoh Jihadi ka Assam.
Kane kala mih hadien ka jingiohkem ba dang shen jong ki Pulit ka Assam ia bun ngut ki Lehnoh Jihadi jong ka kynhun Ansarul Bangla Team (ABT) na Bangladesh kiba wan riehtngen ha kane ka Jylla ba marjan ka Meghalaya.
“Ka tnad Pulit kala shim ia ki sienjam ba donkam khnang ban nym ai jaka ia kino kino ki kynhun pyntriem ne ki lehnoh Jihadi hapoh ka Jylla” ong u Myntri haba pyntip ba ka kynhun Syntiat jong ka Jylla ruh kila treikam khlem shongthait.
U Myntri ula kyntu ia ki Nongshongshnong ba kin long kiba peitsiar bad ai jingtip mar mar lada ki iohi ia kino kino ki briew kiba iashankhmat.
“Haba iadei hi bad ki kynhun Jihadi, kam dei satia ka kam tang hangne ha ka Jylla jong ngi hynrei ka la don ruh ka jingiasam jingtip bad ki bor pahara ka Sorkar Pdeng lem bad kiwei ki Jylla ruh kumjuh namar kane ka dei ka kam kaba buh jingma ia ka Ri baroh kawei” ula ong.
Ula ong baka jingiatreilang bad kiwei ki Jylla kala iaid mynta khnang ban nym ailad ia kino kino ki kynhun kiba buh jingma ia ka jingialong kawei jong ka Ri.
