Shillong, Nailar 10: U Vice President ka National Peoples Party (NPP) Bah Prestone Tynsong hynne ka sngi Balang ula ong ba ka Congress kan sa mad ia ka elekshon MLA 2023 kumba mad ha u snem 1972.
Haba batai antad ia kaei kaban jia ia ka Congress ha kane ka elekshon ban wan, u Bah Prestone uba dei u Symbud Myntri Rangbah ka Jylla bad Nongialam ba rim jong ka Congress, ula ong “Ka Congress kan hap ban pynkhlain biang ia ka nongrim paia jong nga naduh kaba sdang”.
Haba pynkynmaw ia u snem 1972 ba ka Congress kala jop tang katto katne seat, u Bah Prestone ula ong “Mynta kane kan sa jia biang. Kin hap ban phaidien biang sha u snem 1972”.
Une u Nongialam ka NPP ula ong ba u da sngewtynnad palat ba ki MLA barim ka Congress kila sngap ia u ban kynthih noh naka ‘Jhad ba ngam” bad pyllait im ialade na ka jingngam jyllop.
