Shillong, Naitung 11: Ka Deputy Commissioner (DC) ka East Khasi Hills kong R.M Kurbah kala iathuh ba ki don kumba 365 ngut ki briew kiba wan na Manipur ban riehtngen shipor ha nongbah Shillong.
Lah ban kdew ba ka jylla Manipur ka dang don hapdeng ka jingiaumsnam naduh ka 3 tarik Jymmang mynta u snem bad daki hajar ngut ki Nongshongshnong kila phet na katei ka jylla ban lait na kane ka jingiaumsnam.
Haba kren sha ki lad pathai khubor ka kong R.M Kurbah kala iathuh ba mynta ki don satang 77 ngut kiba dang rieh shipor ha Shillong naki 365 ngut kiba la wan poi na ka jylla Manipur.
Ka iathuh ba na kine ki 365 ngut, kiba bun kila leit sha Aizawl, Guwahati Bangalore bad New Delhi lem bad sha kiwei kiwei ki Jylla.
U ADM ka East Khasi Hills bah Ronnie Wahlang ula iathuh ba ki bor District haka jingdon lang ki Pulit ka Madanriting Police Station, kila lum jingialang haduh lai sien bad ha kine ki jingialang la wan lang ruh daki nongialam Shnong ka Madanriting bad ki nongialam jong ka jaidbynriew Waipei, Zoa, Kuki, Gangte bad Meitei.
“Ki jaidbynriew na ka jylla Manipur kila iaroh iaki sienjam ba la shim daki bor district ka East Khasi Hills bad ka Madanriting Police Station, kiba la shimkhia ban iada iaki briew kiba wan phet rieh shipor sha Shillong” la ong u bah Ronnie.
U bah Ronnie ula iathuh ba naka liang ki bor District kila pynbiang iaki jingiada khamtam kito ki phetwir kiba la kham noh ka rta, ki longkmie, ki khynnah bad ki samla pule bad haduh mynta ki bor district, ki pulit, ki rangbah shnong, ki sengkynthei ki dang iai buddien bad kine ki phetwir kiba wan poi napoh ka jylla Manipur.
Ula iathuh ba ki don ruh ki samla pule napoh ka jylla Manipur kiba la wan poi sha Shillong bad ki don kiba la ioh ban bteng biang iaki jingpule jong ki ha ki jaka pule bapher bapher kiba don hapoh kane ka nongbah.
“Ia mynta kim don shuh kiba wan poi sha kane ka nongbah bad kiba dang don ha Shillong ki long satang 77 ngut” ula ong.
Pule lang ia kane: Assam: Hapoh u Kyllalyngkot 2024 yn pyndep ia u statue u Bir Lachit Barphukan ba jrong tam
