Shillong, Risaw 13: Ka jingtohkit ka kynhun Special Investigation Team (SIT) kala pynthikna ba ka jingiap jong I khynnah 4 snem Insaphira Lyngdoh Mawnai ka dei na ka jingpynngam jyllop.
“Ka SIT kala pynshisha ba ka jingjia ngam jyllop ka dei kaba la leh ban pyniap” ong u Superintendent of Police Bah Vivek Syiem haba iakren bad ki nongthoh khubor ha ka sngi Nyngkong.
Ha ka 18 tarik Nailur, u khynnah 13 snem, u para marjan ba ju leit kai bha sha ka iing I Lanot, ula shah kem bad la phah mynta sha ka Juvenile home, hadien ba ka jingkubur ba u ialam ia ine I heprit sha ka Iing ba dang shna thymmai, ka jaka ba lap ia ka metiap ha ka 15 tarik Nailur.
I heprit Insaphira Lyngdoh Mawnai ila jah rngai nala iing na Nongrah Nonglum ha ka por 8 baje mynstep jong ka 14 tarik Nailur.
Haba pyntip ba ia ki daw tynrai ha lyndet kane ka kam bymman ka dei kaba dang tohkit, u Bah Vivek ula ong ba kam pat long shai satia la kane ka kam ka mih na ka daw ka jingiaknieh biskit lane ka jingpyrshang ban leh khlemakor.
Ki don shibun ki daw ia ka jingthmu leh khlem akor. Ka SIT kan shim katto katne por ban pynshisha la ka don ne em kano kano ka jingpyrshang ban leh khlem akor hynrei kawei ka kam kala thikna-ka jingngam jyllop la leh ban pyniap” ula bynrap.
U SP ula kyntait ruh ia ka jingdon kti jong kiwei pat ki briew ha kane ka kam bymman, haba pynthikna ba une u Khynnah 13 snem u la leh marwei ia kane ka kam.
Ka jingtohkit ka dang iaid bad ki Pulit kin sa buh da ka por ban aiti ia ka chargesheet tang mar syndep ka jingtohkit, ula ong.
 kala pynthikna ba ka jingiap jong I khynnah 4 snem Insaphira Lyngdoh Mawnai ka dei na ka jingpynngam jyllop.){kind=link}