Shillong, Risaw 13: U Superintendent of Police ka East Khasi Hills Bah Vivek Syiem u pyntip ba ka SIT ka dang ap ia ka kaiphod post mortem ban lap ia ka rukom long ki dak mong ha ka met jong u Khynnah 7 snem Kyrshanbor Kharmudai, kaba lah ban dei da ka ante-mortem lane post-mortem.
“Ka jingtohkit kala iaid shaid shaid, bad ngi dang ap ia ka kaiphod post mortem ban shai ba kumno une u khynnah u iap” ong u Bah Vivek haba iakren bad ki nongthoh khubor ha ka sngi Nyngkong.
Ia ka metiap u Kyrshanbor, uba la jah rngai nala iing na Nongrah ha ka 8 tarik Risaw, la lap ha ka sngi kaba bud kata ha ka 9 tarik Risaw na khlaw Mawpat.
Haba kylli, u SP ula ong “Ki don ki dak mong, katto katne ki lah ban dei shuwa ka post mortem, katto katne ki lah ban dei ki dak mong ba leh post mortem. Kham bunsien lada ia ka met la buh slem kan don beit ka dak mong post mortem lane ki dak mong hadien ba iap na ki daw bapher bapher”.
Nalor kane, u Bah Vivek ula ong baka SIT kam pat pynthikna satia ia kano kano ka daw bad ka jingsuba ka bun bha ha kane ka kynti.
Ia ka jingthmu ha lyndet kane ka jingpyniap ka dei ka bym pat shai satia bad ki Pulit ki dang iawad ia ki daw bapher bapher, kynthup ka jingdawa pisa, ka jingleh khlemakor lane kiwei kiwei ki daw.
Halor ka jingsuba kam “menshohnoh” ha lyndet kane ka jingpyniap, u SP ula ong ba ha kiba bun ki jingjia, kum kine ki jingjia ki mih na ka jingbuh shun, ka jingbishni lane ka jingpynhiar kput, ban ia ka jingngeit biej.
“Ngam pat ju lap ia ka jingjia khamtam ha ka jingshakri jong ka ba ki briew kila shah pjiar lut ka snam namar ka kam menshohnoh. Ngi la tohkit ia bun ki jingjia ba kynnoh menshohnoh hynrei ka jingshem pat ka long da kumwei” ula ong.
