Shillong, Nohprah 03 : U Myntri Rangbah barim bad nongialam ka TMC Mukul Sangma ula pynthikna ba un ym leit shuh ban iasoh sha ka Congress haba pynpaw ba ka jingmyntoi u paidbah ka Meghalaya ka kham lah ban ia kiei kiei baroh.
Haba kren halor ka rai u para Zenith Sangma ban iasoh biang sha ka Congress, u Mukul ula ong “Phi iakren ia kaei kaei kaba sngewngiah. Mynta ka jingmyntoi jong ki paidbah ha ka Jylla ka kham lah ban ia kiei kiei baroh. Ka kham lah ban ia ka jingmyntoi kino kino ki seng sain pyrthei ne ki seng ba don ha ka bor”.
U Mukul ula ban jur ba ka rai jong u ban mih na ka Congress ka dei kaba la pyrkhat bha bad da ka jingthmu, haba pynpaw “Nga la shim ia ka rai hadien ka jingpyrkhat bha, kam dei ba nga shu rai khlem da pyrkhat ia kaei ka ban leh, ym ban don ia ki jingthmu ia ka lawei”.
Ula pynpaw ia ka jingkut jingmut jong u na ka bynta ka roi ka par ka Meghalaya bad ong “Nga don ia ka lynti iaid kaba la pruid dak bha na ka bynta ka Jylla kum uwei naki dkhot uba la ioh ban shakri ia ka Jylla bad ha kaban tei lang ia ka Jylla bad kiwei ki nongialam jong ka Jylla”.
U Mukul ula ban jur ba ka jingiada ia ka jingmyntoi ka Meghalaya ka dei ka jingbahkhlieh jong baroh bad hateng hateng ka donkam ban iaid da kiwei ki lad ki lynti ruh.
Nalor kane, une u Nongialam ka Liang Pyrshah ula ban jur ba ka jingim long nongialam paidbah jong u kam dei satia ka kam ba kut tang ha ka longiing marwei.
“Ka longiing longsem kan iai neh ka longiing longsem, hynrei nga kwah iathuh ia phi kawei ka kam….shisien ba nga la rai ban don ha ka kam shakri paidbah, ngam dei shuh u nongpeit tang ia la ka jong ka longiing” ong u MUkul.
Halor ka rai u Zenith, u Mukul ula ong “U lah ban don ka jingsngew ba ki jingangnud jong u kin urlong lada u kynriah, hynrei u lah ban bakla….ngan sa pynshisha ia kane”.
