Shillong Iaiong 09: U Myntri Rangbah ka jylla u Conrad K Sangma ryngkat bad u Symbud Myntri Rangbah u Bah Prestone Tynsong hynne ka sngi Balang, ula leit iakynduh ia u Myntri ka Sorkar Pdeng uba khmih ia ka Minority Affairs u Kiren Rijiju ha New Delhi ban iakren bad pynpaw ia ka jingsngewkhia ha kaba iadei bad ka jingtyrwa ban pyntreikam ia ka FCRA Amendment Bill.
Ha kane ka jingialang la iashimbynta lang da ki nongmihkhmat na ka Catholic Bishops’ Conference of India (CBCI) bad kiwei kiwei kiba donbynta lang. Kane ka kynhun ka kynthup ia u President ka CBCI Eminence Anthony Cardinal Poola, Secretary General u Most Rev Anil Joseph Thomas Couto.
Ha kane ka jingiakren, kane ka kynhun kala pynpaw ia ki kamram kiba kongsan kiba la leh ha ka liang pule puthi, ka koit ka khiah bad ki kam shakri ia ka imlang sahlang ha kylleng jong ka jylla Meghalaya bad ha ka thain shatei lammihngi baroh kawei khamtam eh ha ki jaka kiba kyndong kiba sah ki riewlum. Kiba bun na kine ki jaka kidei kiba la kyrshan lyngba ka jingbei tyngka kiba nabar ri, kiba iai bteng ban shakri ia kito kiba dang sahdien bad kala kyntiew bha ia ka roi ka par ha ka thain.
Kane ka kynhun kala pynpaw ia ka jingsngewkhia ha kaba iadei bad ki katto katne ki kyndon jong katei ka Amendment kaba tyrwa, khamtam eh ia ka bynta kaba iadei bad ka jingkurup ia ka jingdon jingem, kaba la pynmih ia ka jingartatien bad jingsheptieng hapdeng ki kynhun Khristan bad ki kynhun kiba shakri ia ka imlang sahlang. Kila banjur ia ka jingdonkam ban don ia ka jingiasyllok kaba iar bad ban iatai sani ban pynthikna ba ia katei ka jingsngewkhia dei ban da shimkhia thikna.
“Ngi lah dep ban pynpaw ia ka jingsngewkhia kaba la pynsngew da ki kynhun Khristan khamtam ha kaba iadei bad ka bynta ban kurup ia ki jingdon jingem bad banjur ia ka jingdonkam ban don ia ka jingiatai bad jingiamir jingmut kaba biang bad kaba ryntih” la ong u Myntri Rangbah.
Haba pynpaw halor ka jingshah ktah ki jaka pule bad ki jaka sumar, ula ong “Ki jaka shakri kiba la kyrshan lyngba ka jingkyrshan pisa nabar ri kadei ka bynta kaba la wanrah ia ka jingkylla kaba khraw ha ka jingai jingshakri ha ka pule puthi, ka koit ka khiah bad ka jingshakri ia ka imlang sahlang ha ki jaka kiba don ha kyndong tam bad kiba sahdien ha Meghalaya bad ha ka thain shatei lammihngi”.
U Myntri ka Sorkar Pdeng u Kiren Rijiju ula shah shkor bha ia ki mat kiba la pynpaw bad ula pynthikna ia ka kynhun kaba wan iakynduh ba yn sa khmih bniah ia kine ki mat kiba la pynsngew. Nalor kane ula pynthikna shuh shuh ba ka jingiasyllok bad baroh kiba donbynta lang ha ka kam yn sa pynlong hashwa ban shim ia ka rai kaba khatduh ia kano kano ka jingpynkylla ia ka Amendment.
“Nga lah ioh ia ka jingai mynsiem na ka jingkular u Myntri ka Sorkar Pdeng u Kiren Rijiju ba yn sa pynlong ia ka jingiasyllok kaba iar bad kiba donbynta ha ka kam bad yn sa khmih bniah ruh ia ki jingsngewkhia hashwa ban shim ia kano kano ka rai kaba khatduh” la ong u Myntri Rangbah.
“Ka jingthmu ka jong ngi ka long ban trei ryngkat bad ka Sorkar India ban pynthikna ba ka ain kan ai jingiada ia ka bha ka miat jong ka ri bad ia ka jingnoh synniang kaba kordor bad ka jingleh ia ki kam isynei da ki kynhun niam” ula bynrap.
Ka kynhun kala banjur ruh ia ka jingkongsan ban pynrung ia ki bynta ban ai jingiada ha ka jingthaw ia ka ain ban pynthikna ba kan don ka jingbteng ia ka jingai jingshakri kiba kongsan ha ryngkat bad ka jingbat skehm ia ka jingkhuid jingsuba ha ka rukom treikam bad ka rukom ai jingkhein jingdiah. Kila pynapw ia ka jingdonkam ban iada ia ka hok bad ia ka rukom treikam jong ki kynhun niam bad ia ki kynhun kiba trei mon sngewbha na ka bynta ka bha ka miat jong ka imlang sahlang.
Haba pynpaw ia ka jingkyrmen skhem hadien jong katei ka jingiakynduh, u Myntri Rangabh ula ong, “Ngi don ia ka jingkyrmen ba lyngba kane ka jingiakren bad ka jingiakynduh, kan sa mih ka lad ban iada ia ka hok jong ki kynhun ha ryngkat ba ka jingdon ia ki atiar kiban pyrkhing”.
