Shillong, Naiwieng 01 : U Symbud Myntri Rangbah ka Jylla ba khmih ia ka Tnad kam Pohing (Police) bah Prestone Tynsong ula pynthikna ba ka Tnad Pulit kan pyrshang kat kaba lah ban pynkut noh ia ki kam dawa pisa jubor jong ki kynhun bapher bapher hapoh ka Jylla.
“Ngi la trei shaid shaid ia ka kam bad ngin pynthikna nangne shakhmat ba kam dei ban don shuh ka jinglum pisa beain ne ka jingdawa pisa” ong u Bah Prestone haba iakren bad ki nongthoh khubor.
Kane ka jingkynthoh u Myntri kala mih hadien arsngi ka jingshah kem u President ka Hynniewtrep National Youth Front (HNYF) East Khasi Hills District Bless Dkhar halor ka jingkynnoh ba u donkti ban lum pisa na ki trok ba kit palat pud, ba kin ioh iaid n aka jingkieng Damsite, Umiam.
Haba pynpaw ba ym don mano mano ruh kiba long halor ka ain, u Bah Prestone ula ong “La ki dei ki shynrang ne Iynthei ne ki Sengbhalang ne mano manor uh, nga kyrpad ba kim dei ban leh ia ki kam ba palat pud.. La phi ong ia ka kamdawa pisa jubor ne lano kano ka kam bein, ngi kyrpad ia phi ban burom ia ka ain”.
Halor ka jingkylli, u Bah Prestone ula ong ba ki Pulit ki kem tang ia ki riew runar kiba donkti ha ki kam bymman.
“Ka shong ha ki Sengbhalang lada ki don eiei, ai ba kin ai jingpynshai namar haba ngi kem ia ki, ngi kem namar ki kam bymman. Ngim lah ban ing eiei la ki dei jong kino kano ka kynhun hynrei ki briew ba ngi kem ki dei kiba donkti ha ki kam bymman” ula ong.
U Bless Dkhar uba shah kem na Pohskeh, la ialam tian bishar ia u hapoh ka Iingkashari District ha ka sngi Ba-ar, kaba la ai bor ia ki Pulit ban pynlong ia ka jingtohkit ba bniah haduh 3 sngi.
