Shillong, Nailur 12: U Symbud Myntri Rangbah ka Jylla Bah Prestone Tynsong, hynne ka sngi nyngkong ula pynthikna baka North Eastern Electric Power Corporation (NEEPCO) kan nym pynkynriah satia ia ka Head Office na Shillong sha Guwahati.
U Symbud Myntri Rangbah ula pyntip ia kane haba jubab ia ka jingkylli bala wanrah da u MLA ka AITC na Mawsynram Bah Himalaya Shangpliang, ha ka Dorbar Synrai jong ka Iingdorbar Thaw Ain.
U Bah Himalaya ula kynnoh ba kat kum ka hukum ba pynmih ha ka 25 tarik Jylliew 2022, lai tylli ki Ophis ba heh kynthup ia ka Ophis u Executive Director of Operation and Maintenance, Director of Contract and Procurement bad Director of Corporate Project Monitoring nalor ki shnat ka Information and Technology bad ka Finance Wing, la dep ban pynkynriah na Shillong sha Guwahati.
U Bah Prestone u pyntip ba u hi shimet ula iakren ia kane ka kam bad ki Bor ha hakhlieh duh halor ka jingmih kot khubor.
“Bad kala wan da ka jingthoh ba kam don satia ba kum kata ka jingpynkynriah na ki Bor ba Hakhlieh duh lane na ki bor pyniaid ka NEEPCO. Ka jingthmu ban pynkynriah ia ka Ophis ka NEEPCO na Shillong sha Guwahati kam don satia” ula ong.
Haba u Bah Himalaya ula kdew ba u Managing Director ka NEEPCO um ju shong Ophis satia ha Shillong bad hato kane kam mut ba ka Head Office ka dei kaba la pynkynriah sha Guwahati, u Bah Prestone ula ong b aka NEEPCO ka don ia ka Ophis treikam ba shipor ha Guwahati kaba dei na ka bynta ban khmih bad pyniaid ia ki project ba ka don ha Arunachal Pradesh bad kiwei kiwei ki Jylla ka thain Shatei Lam Mihngi.
Ha kajuh ka por, u MLA ka Mawsynram ula pan ia ka jingkular na ka Sorkar Jylla ban iada ia ka bha ka miat jong ki trai Jylla kiba trei hapoh ka NEEPCO.
Kat kum ka jingong jong u, ka don ka jingsheptieng hapdeng ki briew kiba trei ha NEEPCO namar kiba bun ki lah ban duh noh ia ka kam lada ia ka Head Officer la pynkynriah sha Guwahati hadien habud.
