Shillong, Iaiong 29 : U Symbud Myntri Rangbah ba khmih ia ka kam pohiing (Police) Bah Prestone Tynsong ha ka sngi Ba-ar, ula pynthikna ba ym don satia ki nong Pakistan kiba sah ha Jylla Meghalaya haba kular ruh ba ka Sorkar kala peitngor bha ia ka jinglong jingman ha ki jaka khappud ka Jylla bad ka Bangladesh.
Haba iakren bad ki lad pathai khubor, u Bah Prestone ula ong “Ia mynta, ym pat don satia ki nong Pakistan ha Meghalaya”.
Ula pyntip ba ka Sorkar ha ka kyrdan jong u Chief Secretary (CS) bad Director General of Police (DGP) ki dang iakren bad ki bor pahara ka Sorkar Pdeng kum ki Border Security Force (BSF).
“Ia mynta, baroh ki kam ki dang biang nadong hadong. Ngi la peitngor bha ia ka jinglong jingman ha ki jaka khappud bad ka Bangladesh” ula ong,
Haba kubur ba ka jinglong jingman ka dei ka bym lah ban batai, u Bah Prestone ula iathuh ba la dep ai ia ka jingbthah kaba shai ban pynthikna ba ym dei ban don ki briew kiba ioh rungtuh shapoh u pud u sam ka ri India.
“Namar kata, wat na ka liang ka Sorkar, ngi la bthah ia baroh ki Khlieh Nongsynshar, ki bor pyniaid Shnong ba kin iatreilang bad ki bor pahara bapher bapher khnang ban gin long kiba shngain bad ban nym ailad ia ki mynder ba kin wan rung shapoh u pud ka ri India”.
Haba pynpaw ba ka jingiohkem ia ki nong Bangladesh na kylleng ki jaka jong ka Jylla ka dei ka kam kaba sngewkhia bha, u Symbud Myntri Rangbah ula ong “Ta ka daw nga ong, ngi ju iashong ia ka jingialang para ma ngi hapdeng ki bor pahara ka Sorkar pdeng bad ka Sorkar Jylla bad ngi la peitngor 24×7 bad lada don kino kino ki jingjia, ngi long kiba la khreh ban leh eiei ia kine ki jingtynjuh”.
Ha kajuh ka por, u Bah Prestone ula pyntip ba ka Sorkar kala pyrshang ruh kat kaba lah ban pynbeit ia ki kam jaka ha ki jaka khappud ka Bangladesh ki bym pat ker sainar.
“Ngi la iakren ia kane ka kam ruh. Ki don ki bynta ki ba dang hap ban iapynbeit. Ka jingeh hi ka dei ka kam jaka. Ki trai jaka bad hateng ki bor shnong ki pyrshah ia ka namar lada ngi iaid kat kum ka jingthmu ba iadei bad ka jingker sainar, kin don ki jaka ki ban hap shabar jong ka jingker bad lada ki don shabar ka jingker, bunsien la ju khein kum ka jaka bym dei jongno jongno ruh (no man’s land)” ula ong.
“Namar kata, ngi dang iapynbeit ia kane ka bynta, bad nga thikna ba ki Deputy Commission kila shimkhia bha ia kane bad kila iakren ia ki trai jaka bad ki bor shnong ban pynbeit ia kane ka kam” ula bynrap.
 Bah Prestone Tynsong ha ka sngi Ba-ar, ula pynthikna ba ym don satia ki nong Pakistan kiba sah ha Jylla Meghalaya haba kular ruh ba ka Sorkar kala peitngor bha ia ka jinglong jingman ha ki jaka khappud ka Jylla bad ka Bangladesh.){kind=link}