Shillong, Iaiong 29: U Symbud Myntri Rangbah ka Jylla uba khmih ia ka Tnad Kam Pohiing Bah Prestone Tynsong hynne ka sngi Baar, ula pyntip ba ka sorkar jylla ka dang ap ia ka jubab na ka Defence Ministry halor ka jingkyrpad ban ai ia ka jaka ban pynkynriah ia ki 342 tylli ki longiing na Harijan Colony, Them Iew Mawlong.
Haba iakren bad ki nongthoh khubor, u Bah Prestone Tynsong ula ong ba ka jingialang kaba ula lum kam shym la long kaba ka seisoh.
“Ia mynta hi ka jingialang kam shym la long kaba seisoh, kumta ngam lah ban batai eiei than.”
Haba kylli, u Symbud Myntri Rangbah ula pyntip ba ka jingialang kala iakren ruh halor ka jingkyrpad ka sorkar jylla ban ai ia ka jaka ka bym shym la pyndonkam da ka tnad Defence na ka bynta ban pynkynriah ia ki longiing jong ki Harijan. Kumta ka sorkar ka dang ap ban ioh ia ka jubab na ka tnad Defence halor katei ka kam.
“Hooid, ha ka jingshisha ngi lah dep iakren ia katei ka mat bad mynta ngi dang ap ia ka jingpyntip na ka Sorkar India lyngba ka Defence Ministry namar ia ka shithi la phah sha ka Defence Ministry bad ngim pat ioh ia kano kano ka jingpyntip na ki bad ha ka jingshisha, ngi lah kyrpad ia ka Sorkar India lyngba ka Defence Ministry lada ki lah ban ai ia ngi ia katei ka jaka, ia kaba ym shim la pyndonkam da ka tnad Defence. Nga thara ym don ba sngewtynnad ia katei” ula ong.
“Ia mynta hi, u Commissioner and Secretary jong ka tnad Urban Affairs ula buddien ia kane ka kam bad ka Defence Ministry, shen ngin sa ioh ia ka jingpyntip na ki” la ong u Bah Prestone.
