Hiar ialap ka Tnad ka Koit ka Khiah ia ki jingma ka jingpang Rabies ha Killing

Nongpoh, April 29: Ka Ophis u District Medical and Health Officer (DMHO) ha ka sngi Ba-ar, kila hiar sha ka Shnong Killing, Ri-Bhoi District, ban ialap paidbah halor ki jingma kiba ap na ka jingpang rabies, (jingpang ba ioh naba dait ksew, miaw kiwei), kaba lah ban shim wat ia ki mynsiem briew.

Ia kane ka prokram la pynlong da ka tnad ka Koit ka Khiah ha ryngkat ka jingiatreilang bad ka Animal Husbandry and Veterinary, ha Iingdorbar jong ka shnong Killing.

Ki nongai jingkren shaphang kane ka jingpang ki kynthp ia ka Dr. A.J Syiemlieh District Surveillance Officer, u Dr. Aiban Phancon ba la mihkhmat na ka tnad Animal Husbandry and Veterinary bad kiwei kiwei.

Lah ban kdew, ba kane ka jingshimkhia jong ka tnad ka Koit ka Khiah ban ai jinghikai halor ka jingma jong ka jingpang Rabbies, ka long ruh hadien ba kawei ka longkmie ka la khlad na ka jingshah dait ha la u jong u ksew ba ka ri tang namar bym shem la shimkhia ban ioh ia ka lad jingsumar ha ka por ba biang.

Na ka liang ka Dr. AJ Syiemlieh, ka la batai shai, ba kane ka jingpang Rabbies ka long ka jingpang kaba ma kaba pur na ka jingshah dait ha ki ksew, ki miaw bad kiwei kiwei ki mrad lada ym ioh ia ka jingsumar ha ka por kaba biang lyngba ki injeksion bad kiwei kiwei kane ka jingpang ka lah ruh wat ban shim ia ka jingim jong ki briew.

Ka la kyntu ruh, ba kino kino ki briew kiba Ieid mrad bad kiba ju ri jingri ha la ki iing ki sem, ki dei ban da pyndep ia ki jingai injection ia ki mrad jong ki, khnang ban iada ia ki trai bad wat ia ki khyllung khynnah ban lait na kane ka jingpang Rabbies lada don ka jingshah dait ne shah trut ha kine ki mrad.