Shillong, Iaiong 10: U Symbud Myntri Rangbah ka jylla bah Prestone Tynsong u ba khmih ruh iaka tnat kam pohïing ula ong ba ka tnat Pulit ka jylla kan pynthikna ha kaban tehlakam iaka kam tih bad khaii beain dewiong napoh ka jylla.
Haba kren sha ki lad pathai khubor u bah Prestone ula ong ba wat lada ki bor Pulit ki treikam baroh shisngi, kin don beit kiba shim kabu bad kiba pynkhein iaka ain haba iadei bad ka jingtih bad khaii beain dewiong.
“Ngim lah ban tip, lano u nongtuh un wan hynrei watla katta ruh ki bor Pulit ka jylla kila pyrshang katba lah ban tem ia kino kino ki kam beain la kadei bad u dewiong ne bad kino kino ki kam beain” la ong u bah Prestone.
Lah ban kdew ba ka ïing bishar ka Meghalaya High Court kala pynmih daka hukum ban wanrah da ki Pulit Central Industrial Security Force (CISF) ban tem iaka kam tih bad khaii beain dewiong ha Meghalaya.
Haba kylli u bah Prestone ula ong ba ki Pulit ka jylla ki la biang lut nadong shadong ban tem ia kino kino ki kam beain hapoh ka jylla.
“Nga kwah ban pyntip sha ki paidbah ka jylla ba ki Pulit kila biang lut nadong shadong ban leh iaka ba donkam ban tem ia kino kino ki kam beain” ula ong.
U bah Prestone ula pyntip ruh ba haduh mynta ka sorkar kam pat shim ia kano kano ka rai, la kan jubab ne em shaka Ïing kashari haba iadei bad ka hukum ban khot daki Pulit CISF ban pyntreikam ha Meghalaya.
“Ka sorkar jylla kala phah ruh daka shithi shaka tnat Ministry of Home Affairs (MHA) bad shaka CISF haka ba la jubab ba kam lah ban phah Pulit khambun” ula ong.
