“Ka Notification ka Sorkar kam lah ban iuhroit ia ka Riti Synshar ka Ri”
Shillong, Nailur 09: U Myntri Rangbah ka Jylla Conrad Kongkal Sangma hynne ka sngi Thohdieng ula pynthikna ba ka Notification jong ka Sorkar halor ka CrPC bad CPC kan ym ktah ia ki Iingkashari District Council haba ong “Kane ka Notification kam lah ban iuhroit ia ki kyndon jong ka Riti Synshar ka Ri kaba aibor ia ki Iingkashari bala thaw kat kum ka Sixth Schedule”.
“Ka Riti Synshar ka Ri ka dei kaba khlain ban ia ki ain ki Jylla. Ka Riti Synshar kala aibor da kaba shai ha ka para 4 bad 5 ba u Lat u don ia ka bor ban thung ia ki Judge jong ki District Council….bad ym lah satia ban kylla da ka notification jong ka Sorkar Meghalaya” ong u Conrad haba iakren bad ki nongthoh khubor.
Kane kala mih tang shisngi hadien ba ka Khasi Hills Autonomous District Council (KHADC) kala pyrshah jur ia ka rai jong ka Kynhun Myntri ka Sorkar ba mynjur ia ka notification ne jingpynbna ban pyntreikam ia ka CrPC bad CPC ha baroh ki Iingkashari ka Jylla.
Ka KHADC kala dawa iaka Sorkar Jylla ban pynrung ia ka ktien “pyllait noh ki Iingkashari bala thaw hapoh ka Sixth Schedule jong ka Riti Synshar ka Ri” ha ka jingpynbna ban pynthikna ba ki bor jong ki Iingkashari District Council kin ym shah pyntroin noh.
Halor kane, u Conrad ula ong ba ki Iingkashari District Council kila lait lypa na ka jingtreikam jong kane ka notification ka Sorkar Jylla.
“Kam long kaba donkam ban ong (pyllait noh) namar ka Riti Synshar ka Ri kala dep ai ia ka jingiada ia ki Iingkashari District Council bad namar kata, kam don nongrim ban khuslai naba ka jingthmu jong ka notification ka long eh tang ha kaban pynthikna ba ki Judicial Magistrate jong ki IIngkashari District Session kin pyndonkam iala ka bor bad kan ym ktah ia ki bor jong ki Iingkashari District Council” ula bynrap.
Haba kylli, u Myntri Rangbah ula ong “Ki shu kwah ba ka notification kan kham long shai khnang ba lashai lashisngi yn ym don ba pyndonkam ia kane ka notification bad pyrshang ban kyntur ia ka bor jong ki. Nga tharai kane ka dei ka jingsngewkhia jong ki District Council”.
“Ka jubab jong nga ia kata ka long, ki notification hi ki dei kiba lah ban pynkylla ia ki kyntien ne pynrung kyntiew shuh shuh hynrei ka jingiada kaba khraw eh ba ki ioh ka dei ka Riti Synshar ka Ri bad ka Sixth Schedule” ula bynrap.
U Conrad u ong “Lada lashai lashisngi ki mih kino kino ki jingeh ne jingbym sngewthuh ia kaba nga thikna ba kin ym mih satia, ha kata ka por, ki Disrict Council ki lah ban leit da kaba suk sha Iingkashari namar ka para 4 bad 5 jong ka Sixth Schedule kala kren shai ia ka bor jong ki Iingkashari District Council”.
U Myntri Rangbah ula ban jur ba kam don satia kano kano ka jingmushlir, ne jingtam pud sha u pud u sam jong ki Iingkashari District Council haba bynrap ba kine ki Iingkashari hi kin treikam kumba ju long baroh shikatta.
Lah ban pynpaw hangne ba u CEM ula pyntip ba un sa khot ia ka jingialang jong baroh ki MDC ha ka sngi nyngkong ban wan, ban iakren bad iashim rai lang kawei halor kane ka kam.
