Shillong, Nohprah 02 : U Myntri Rangbah ka Jylla Conrad K Sangma hynne ka sngi thohdieng ula ong ba ka jingkhot hajir jong ka National Investigation Agency (NIA) ia ki Nongialam ba hakhlieh ka HNLC kan ym ktah eiei ruh em ia ka jingiakren iasuk hapdeng ka Sorkar bad kane ka kynhun kiengatiar.
“Hooid, nga sngewthuh ba ki dkhot ba don bynta ki dei kiba shah khot hynrei kumba nga ong ba ia ka jingiasyllok bad ka jingiakren iasuk ka dei da ka jingthmu ban wad ia ka lynti khnang ban lah pynbeit ia kum kine ki jyrwit jyrwat” ong u Conrad haba iakren bad ki nongthoh khubor.
Ka Iingkashari Special Court ka NIA, Shillong, dang shen kala khot hajir ia ki nongialam ka HNLC kiba kynthup ia u Bah Bobby Marwein, Marius Rynjah bad Bah Sainkupar Nongtraw – haba bthah ba ki dei ban wan mih hakhmat ka Iingkashari ha lane shuwa ka 4 tarik u Kyllalyngkot 2023.
Haba pynpaw ba kane ka kam, kam don jingiadei eiei ruh em bad ka jingiakren iasuk, u Myntri Rangbah ula ong “Kane (khot hajir) ka dei kawei pat ka kam..Kato ka dei ka jingtohkit ha kawei pat ka kyrdan.Kam don jingiadei bad ka jingiakren kaba ngi pynlong ia kaba la leh ban lah pynthikna ba kum kine ki jyrwit jyrwat kin nym mih shuh. Kane hi ka dei ka jingthmu jong ka jingiakren”.
U Conrad ula pynthikna ruh ba un sa iakren bad ka Home Ministry bad ong “Ngin sa peit bad ngin sa pyrshang ban wad ia ka lynti kumno ba ngin iaid shakhmat halor kane. Kumba nga ong ba kine ki dei ki case ba iapher, kine ki dei ki case kiba dang tohkit ha ki kyrdan bapher bapher hala ki jong ki nongrim ki bym iadon bynta bad ka jingiakren iasuk”.
Halor ka jingbuh jingkylli jong u Nongialam ka AITC Dr Mukul Sangma ia ka Sorkar ba kala khot iadonlang ia ka Sorkar Pdeng ha kane ka jingiakren iasuk, u Myntri Rangbah ula ong ba ka Sorkar ba dang shu dep kam shym la nud ban shim ia ka sienjam jam ban pyniaid shakhmat ia ka jingiakren bad ka HNLC, kaba kila dei ban leh.
“Kam pher ia kata hynrei kane ka Sorkar kala jam shakhmat bad khlem pep ba kine ki jingkren kin ym jia khlem ka jingiasyllok jylliew bha bad ka Sorkar Pdeng. Nga la dep kren la bun sien ba nga la dep iakren haduh 8-9 sien bad u Myntri kam Pohiing ka Ri, nga la iakren bad u Home Secretary bad kiwei pat ki Heh Ophisar ka MHA” ula ong.
