Shillong Nailar 03: Ki nongialam ka HSPDP hynne ka sngi balang, kila pynthikna baka Atomic Mineral Division (AMD) jong ka Sorkar Pdeng, kam don jingthmu shuh ban nang wad jingtip ia ka jingdon jong u marpoh khyndew Uranium hapoh ka Jylla Meghalaya.
Ia kane la pyntip da u President ka HSPDP Bah KP Pangniang hadien ka jingleit iakynduh ia u Regional Director jong ka Atomic Mineral Division (AMD) North East Region u Dr Prakhar Kumar.
U President ka HSPDP u Bah KP Pangniang u la pyntip ba u Regional Director u la kubur ba u tip bha ia ka seng HSPDP khamtam ia u President barim u Bah HS Lyngdoh uba pyrshah jur ban tih ia u Uranium bad u la pynshai ba watla u Uranium u don bun bha haka jylla hynrei ka AMD kam don kano kano ka jingthmu ban tih ia u Uranium bad kila pyni ruh ia ki kot ki sla ba kam don kano kano ka jingthmu ban wad bniah ia u Uranium.
“Ka HSPDP ka ieng beit ha ka nongrim ban pyrshah jur ban tih ia u Uranium bad lada ka sorkar pdeng ka kwah ban leh jubor ban phah tih ia u Uranium, ka HSPDP kan ieng pyrshah ban iakhun bad kam salia ban shah set phatok ruh. Kan mih ruh ka jingiakhih kaba jur ban pyrshah iaka jingtih Uranium” ong u Bah KP Pangniang.
“Wat ka ophis jong ka Uranium Corporation of India Limited (UCIL) kaba don ha Nongthymmai ruh kala khang khyrdep namar ka jingpynsangeh ia ka kam tih uranium ha Jylla” ula ong.
U President ka HSPDP u la ong, ba ha u snem 2020 kala don ka jingpei jong ka jaka tih ia u Uranium ha Nongbah Jynrin bad ka HSPDP kala phah da ka jingthoh sha ka sorkar jylla ban pynthikna ba kam dei ban don kano kano ka jinglait shabar erbih u uranium.
Halor ka jingkhang noh ka UCIL ia ka skul ha Domiasiat, une u Nongialam ka HSPDP ula ong “Ka HSPDP ka dawa ba ym dei ban khang ia katei ka skul tang naka jingpyrshah tih Uranium, namar kane ka dei ka dei kaba ai jingshakri ia ki khynnah”.
U Bah Pangniang u la pan jingshai ruh ha kaba iadei bad ka jingshna iaka surok na Nongstoin, Rambrai, Kyrshai bad kumjuh ruh iaka surok na Nongstoin shaduh Domiasiat.
“Ngi pan jingshai namar ban tip la kine ki surok ki don ne em ka jingiadei bad ka jingtih Uranium hynrei ka jubab ba ngi ioh ka long ba kine ki surok kim don jingiadei bad ka jingtih Utranium” ula ong.
