Shillong, Risaw 30 : Ka Shillong Cherry Blossom Festival 2025, kala pynthikna ba ka kynhun rwai na Denmark, ka AQUA-kaba rwai ia ka jingrwai ba pawnam kum ka “Barbie Girl”, “Doctor Jones” bad “Turn Back Time”, kan wan ban pynlyng-uh ia ka tamasa mynta u snem ha Nongbah.
Ka AQUA kan don lang ha ka thup ki nongrwai ba kynthup ia Norah Fatehi, Diplo, Jason Derulo bad The Script, ka ban nang pynskhem shuh shuh ia ka nam jong kane ka tamasa kum kawei na ki tamasa kiba heh hapoh ka ri India.
Ki nongpyniaid kila ong ba ka jingwan lang sa ka AQUA ka pyni ia ka jingkut jingmut jong ka tamasa ban ai ia ka rynsan iaput iatem kiba pher bap her-naduh ki pop, indie, rock bad ki jingrwai tynrai.
“Mynta u snem ngi sngew ba ka long kyrpang bha” ong ka kynhun ba pyniaid bad bynrap “Ka thong jong ngi ka iai long ba ngin pynlong ia ka Shillong kum ka jakapdeng jong ka rynsan iaput iatem ha dewbah South Asia”.
Nalor ka put ka tem, ki nongleit tamasa kin ioh ruh ka kabu ban khmih ia ki tamasa ka riam ka beit, ki jingialehkai, ka bam ka dih bad kiwei kiwei.
Ka Shillong Cherry Blossom Festival 2025 kan long ha u bnai Naiwieng ha Shillong da ka jingkyrshan jong ka Sorkar Jylla bad ka Tnad Jngohkai.
