Shillong, Naiwieng 24: Hapdeng ka jingjur ka jingiakynad ha ka jylla Manipur, u Lieutenant General Vikas Lakhera u Director General jongka Assam Rifles, ula pynthikna ba ki shipai kin iengskhem halor ka hok.
Haba iakren bad ki nongpathai khubor ha nongbah Shillong, ula ong, “Ngi don hangne ban pynthikna ba ngi ia wanlang bad ki paidbah, ngi shakri ïa ki paidbah bad ngi pyrshang kat kaba lah. Watla kaei kaei kaba jia, ngin ym pyllait ia ka lynti jongka hok. Kiba leh hok kin hap ban mad ia kiei kiei baroh, hynrei ngin ym iehnoh ia ka lynti jong ka hok bad ngin iai bteng ban pyniasoh”.
“Ki shipai jong ngi ki wan na ka thain shatei lammihngi bad ki bun bah. Ngi donbynta ha ka imlang sahlang bad ngim pher na phi. Phi shakri ia ka ri kumba nga shakri ma nga. Lehse ka por kan sa batai, hynrei ka thain shatei lam mihngi ka long ka jaka kaba phyla, ka jaka kaba bha ban shong ban sah” ula ong.
Katba ka Assam Rifles ka dang bteng ban leh ïa ka kamram kaba kongsan ha ka thaiñ bad pynskhem ïa ka khappud Indo-Myanmar, ki khubor ki pynpaw ba ka lah ban pynmih sa ia kawei pat ka kynhun shipai ne Batallion.
Halor kane, u Lieutenant General Lakhera ula ong, “Kane ka dei ka mat bad ka Sorkar India. Hynrei ngi kwah eh ban kiew bad kino kino ki jingai jingmut halor kane ka bynta, tang ka por hi kan sa batai”.
Haba pynsngew ia ki sienjam kiba la shim, u DG ula batai ba kila pyrshang ban iashimbynta haba wan lynshop ki bor mariang lyngba ka NDRF Batallion ha Ludhiana.
“Man la ka por ba don ki jingjia ba sngewsih ne ka jingwan lynshop ka bor mariang, la ka long ka jingshlei um ha Imphal, ka jingtwa khyndew, ki jingjia aksiden, ne ki jingjia kiba don kyrkieh ia ka jingsumar, la buh ïa ki Assam Rifles. Ngi dei ka kynhun kaba heh tam ha ka thaiñ ban nongsynniang ia ka snam. Ka snam jong ki shipai jong ngi ka tuid ha ki thied ki jaw jong ki nongshong shnong bym lah kheiñ shuh, ha ka thaiñ Shatei Lammihngi.”
Ha kaba iadei bad ka jingpynkylla thymmai, u DG ula banjur ba ka jingpynrung ïa ki kor ki bor kiba thymmai, kan pynthikna ba ki Assam Rifles kan neh hakhmat eh ha baroh ar ki kam kiba kynthup ia ka kam pahara bad ka jingïarap ïa ki briew.
