Pynskhem u CM ban nym shah tih Uranium ha Jylla | Yn leit iakren sha Delhi halor ka OM ka MoEFCC

Shillong, Nailur 30 : U Myntri Rangbah ka Jylla Conrad K Sangma ula pynskhem biang ia ka nongrim jong ka Sorkar ba ka pyrshah ia ka jingtih Uranium ha Meghalaya haba kular ba un sa leit iakren bad ka Sorkar Pdeng halor ka Office Memorandum (OM) ba pynmih dang shen da ka Ministry of Environment, Forest and Climate Change (MoEFCC) hadien ba dep bishar bha ia ka jingshong ain jong ka.

Ka Office Memorandur, kaba tyrwa ban nym pynlong shuh ia ka jingiasyllok paidbah bad ka public hearing ia ki project tih par ba dei jong ki otomic mineral kum u Uranium, kala pynsngewkhia jur bha hapdeng ki nongshongshnong namar kine ki kam ki long kongsan bha ia ka Environmental Impact Assessment (EIA).

“Kum ka Sorkar ngi la kren shai bha ia ka nongrim ba ki briew jong ngi bad ki kynhun bapher bapher, bad wat ka Sorkar ruh kam kwah satia ban tih uranium ha Jylla. Ngi la kren shai bha ia kane bad ngi la kren haba shit haba shai ia kane ka mat bad nga kren biang mynta haba shit haba shai” ong u Conrad haba iakren bad ki nongthoh khubor ha ka sngi Ba-ar.

U Myntri Rangbah ula pynpaw ia ka jingsngewkhia kaba jur halor kane ka jingpynbna (notification), haba pynpaw ba watla um pat shong bishar ia kaei kaba don ha kane ka OM, kane ka kam ka donkam ia ka jingbishar ba bniah kat kum ki lynti ka ain.

“Haba pynshong nongrim na kaei kaba ngi lap, ngin sa pan jingpynshai na ka Sorkar India haba donkam bad ngan sa iakren ruh bad ka Sorkar India ha ki kyrdan bapher bapher bad pynthikna ia ka jingiada ia ka bha ka miat ki briew jong ngi” ula kular.

“Kumta, ka dei ka jingbahkhlieh jong ka Sorkar bad lada ngi shem hangno hangno ba ki don ki ain lane ki jingpynbna kiba iaid pyrshah ia ka bha ka miat ki briew jong ngi, ka dei ka kamram jong ka Sorkar ban iakren ia kane ka kam bad ka Sorkar Pdeng bad nga kular ha phi bad nga kular ia ki paidbah ka Jylla ba ngin ia ieng ryngkat bad ki paidbah ha kane ka kam” ula bynrap.