Nongpoh, Risaw 26: Ban pyniaid beit ia ka synshar ka Khadar katkum ki riti ki dustur ba la buh da ki longshuwa ki manshuwa, ka Hima Khad-ar Lyngdoh mynta ka sngi Balang ka la pynskhem ia u Bah Sisten Nongrum kum u Rangbah Shnong ba pura jong ka Shnong Harlibagan.
U Bah Sisten Nongrum u dei uba la jied da ki paidbah nongshongshnong ka Harlibagan myn ha ka 15 tarii Risaw hadien bala kut noh ka samoi treikam jong u Rangbah Shnong ba thymmai. Ka Harlibagan ka dei kaba hap hapoh ka Raid Nongkyrla jong ka Hima Khad-ar Lyngdoh.
Ia une u Rangbah Shnong la pynskhem da u Paiem ka Hima Khad-ar LyngdohPaiem Wanphang Syiem Nongshai uba la pynkup ia ka spong ka phalli kat kum ka riti ka Durstur. Ha kane ka sngi, u Syiem ula aiti ruh ia ka sanat kum ka jingpynskhem bad ai jingithuh ia ka kam Rangbah Shnong.
Ia kane ka jingialang la pynlong ha Iingdorbar Hall jong ka Shnong Harlibagan ha ka jingiadon ryngkat u Lyngdoh ka Raid Nongkyrla Bah Phrangsngi Syngkli, MDC barim Bah William Mynsong, u Myntri Namsaw Bah H Namsam bad ki riew rangbah ka thain.
U paiem, Wanphrang Syiem u la kyntu ia ki paidbah nongshong shnong ka Harlibagan ba ki dei ban ai ka jingiatrei lang ym tang ban pynneh pynsah ia ka riti ka dustur bad ka khyndew ka shyiap, hynrei ki dei ruh ban ai ka jingiatrei lang na ka bynta ban wan rah ia ka shongsuk shongsain bad ka roi ka par hapoh ka shnong ka thaw khnang ba ki khun ki hajar kin dang kiew arted ha ka jingim na ka por sha ka por.
U la khot la wer ruh ba ki dei ruh ban ai ka jingiatrei lang bad ka Raid bad ka Hima ha ryngkat ka shnong namar haba don ka jingiatrei lang kin wan shibun ki jingkylla la ka long ha ka shongsuk shongsain bad ha ka roi ka par ba ki paidbah ki donkam.
