Shillong, Naitung 07: Ka Myntri ka Tnad kam rep ka Jylla Kong Ampareen Lyngdoh hynne ka sngi Thohdieng kala pyntip ba ka Tnad kala ai ia ka lad kamai jakpoh sha ki briew ba sah ha ki district ba don kyrhai u dewiong ka Ri-lum Jaintia Hills.
Haba iakren bad ki nongthoh khubor, ka Kong Ampareen kala ong “Kiba bun ki tnad kila iawan iatreilang ha kane ka bynta ban pynkohnguh iaki briew ka Ri-lum Jaintia ba tad haduh ka por ba la don ka lynti kaba biang ban tih dewiong biang, kine ki dei ki lad bad sngewbha ban iatreilang bad ngi bad phaikhmat sha ki lad ki kabu ban kamai jakpoh ha ka lynti kaba dei”.
Ka ong ba ka Tnad Agriculture kala shim ia ka sienjam ban iakhun ia ka jingkylla ka suinbneng bad pyrshang ban pynshlur ia ki nongshongshnong na East Jaintia Hills bad katto katne ki jaka ka West Jaintia Hills, kiba dei ki jaka tih dewiong, ba kin phaikhmat biang sha ki kam rep.
Kine ki artylli ki District ha kine ki khyndiat snem kila sakhi ba ka kamai ka kajih ki hajar ngut ki briew kila shah ktah namar ka jingkhang tih dewiong hapoh ka Jylla.
“Ngi la lah ban pynkohnguh ia ki ban phaikhmat sha ka rep ka riang kum kawei pat ka lad kamai jakpoh khang ba ha ka juh ka por phi iarap ruh ban leh eiei halor ka jingjot ka mariang kaba la ktah mynta, phi tip ia ka um bad kiei kiei baroh, mynta ngi hap ban phaikhmat sha ki lad ki lynti ban leh eiei” kala bynrap.
Haba pynpaw ba ka Tnad kala pyrshang ruh ban pynshlur ia ki briew ban thung ia ki soh niamtra Khasi, ka Kong Ampareen kala ong “Phin ym tang ban pynbun ia ki khlaw ba jyrngam hynrei phi ioh ruh ia ka lad kamai na u sohniamtra uba roi bha ha ka thain”.
“Ngi la tip bha ia ka jingshisha ba bun ki jaka ha Ri-lum Garo ki dei kiba thung ia ki jingthung organic, kim ju ai dawai ia ki jingthung, ngi dang pyrshang ban pynseisoh pat ia ka khyndew” kala bynrap.
Kala pyntip ruh b aka Tnad kala pynshlur ruh mynta ia ki kam pynmih mar jingbam la ka dei na ki soh ne na ki jhur ki jhep.
Ka Myntri kala pynpaw ia ka jingkmen ba ka Ri-lum Jaintia kala pynmih ia ki nongrep kiba la kiew bha bad ong ba kine ki nongrep kila iatrei bha ia ka kam.
Pule ruh: “Wat pynlut por ha ki kam bym phoida” ong ka Myntri ia ka VPP namar ka Reservation Policy
