Nongpoh, Jymmang 30: Kum shibynta ban pynshlur ia ki Nongshongshnong ba kin long kiba kloi ban synniang ia ka snam halor ka nongrim ba “Ka jingai snam ka dei kaba ai bad ba iada ia ki jingim”, ka Myntri ka Koit ka Khiah Kong Ampareen Lyngdoh bad u MLA ka Nongpoh Bah Mayralborn Syiem, kila lamkhmat ha ka prokram noh synniang snam bala pynlong hynne ka sngi Ba-ar ha Parish Hall, Nongpoh.
Ia kane ka prokram ba kynthup ruh ia ka jingpynsngewthuh paidbah halor ka jingkongsan ban ai snam, la pynlong da ka Tnad Directorate of Health Services, ka Meghalaya Aids Control Society, ka Meghalaya State Blood Transfusion Council ka National Health Mission ha ka jingïatrei ryngkat bad ka terumo blood and cell technologies.
Haba kren ha ka jingialang, ka Dr. Ampareen kala pynshai ba ki paidbah kim pat da sngewthuh bha halor ka jingkordor jong ka jingai snam namar ka jingtieng jingsmiej hynrei ka ong ba kim dei ban sngewthuh bakla ne shah ïalam bakla namar ka jingai snam na ka por sha ka por ka ïarap ym tang ïa kito kiba donkam snam kyrkieh hynrei ka ïarap ruh na ka bynta ka koit khiah jong kito kiba ai snam kumjuh.
Ka la ong ruh, ba ka jylla Meghalaya ka dang duna bha ha ka jingdon jong ki nongai snam bad kane ka la buh jingeh ïa kiba bun ki jaka sumar ban pyndap snam sha ki paid nongpang khamtam na ka bynta kito kiba mad ïa ki jingjia aksiden kiba ju jia khahkhah ha ki surok bah bad kiwei kiwei.
Kiba la iadonlang ha kane ka sngi ki kynthup ia u Chairman ka Meghalaya State Health Advisory Board, Bah Mayralborn Syiem MLA ka Nongpoh, u Arpit Upadhyaya, Deputy Commissioner, u Abhishek Saini, Assistant Commissioner ka Ribhoi District, U Dr. P Kharnarri, DMHO Nongpoh, Ki Doctor bad kiwei kiwei ki heh Ophisar na ki tnad bapher bapher bad ki riew paidbah.
