Imphal, Jymmang 30 : U Myntri kam Pohiing ka Ri Amit Shah hynne ka sngi Ba-ar, ula hiar jurip ha Churachandpur District ka Manipur, kaba la shah ktah jur eh na ka thma iapher jaidbynriew kaba la jia naduh ka 3 tarik u Jymmang.
U Amit Shah ula pynlong ruh ia ka jingialang bad ka Kynhun Myntri ka Manipur bad la shim ia ka rai ban ai song jingiarap ba mar T. 10 lak sha ki Longiing kiba la duh noh iala ki baieid bathoin na kane ka thma iapher jaidbynriew.
“Ha kane ka jingialang, la shim rai ban ai kam Sorkar ia ki bahaiing jong kito I briew ba shah pyniap hakane ka thma. Ia kane ka song jingiarap yn iasam ban ai da ka Sorkar Pdeng bad ka Sorkar Jylla” ong ki Heh Ophisar ka Manipur.
U Amit Shah ula pynlong ruh ia ka jingialang bad ki Kynhun Sengbhalang bapher bapher, ki Nongialam ba paw khmat na ki paid riewlum lem bad ki bor pahara nalor ki nongpyniaid District.
“Kane ka jingiakren ka long eh na ka bynta ban tip ia kaei kaba jia sha ki shnong ki thaw bad ban lum jingtip nalor ban sngewthuh khambha ia ki jingeh kiba iakynduh da ki Jaidbynriew kiba shah ktah” ong ki heh Sorkar.
Kiba la iadonlang ha kine ki jingialang ki kynthup ia u Myntri Khynnah ki kam Pohiing ka Ri u Nityanand Rai, Nongaiktien ka BJP bad Northeast Coordinator Sambit Patra, u Home Secretary ka Sorkar Pdeng Ajay Bhalla, u Chief Security Adviser ka Manipur Kuldeep Singh bad kiwei kiwei.
