Shillong, Nohprah 12: Ka Headquarters 101 Area, Indian Army bad Rajya Sainik Board, hynne ka sngi Baar kila pynlong ia ka Ex Servicemen (ESM) Rally ha Tura ia kaba la wan ban iashimbynta da ki shipai kiba la shongthait bad ki kurim jong ki shipai kiba la khlad noh.
Ka MP Lok Sabha na Tura Constituency ka Agatha K Sangma, kum ka kongsan haba kren ha ka jingialang kala pynpaw iaka jingsngewnguh ia ka jingai jingshakri ki shipai bad kala ong ba bun ki shipai kila shongthait dang kloi na ka kam bad ka sorkar kala sdang ia ki skhim kum ka CM Elevate bad Promotion and Incubation of Market Driven Enterprises (PRIME) ha kaba kine ki shipai kin nang ioh ia ka lad ban pyntbit shuh shuh ialade bad ban pyndonkam ia ka buit bad ka sap ka jongi ha kaban seng kam lajong.
Kala ong, ba ka sorkar Meghalaya ka dang trei shitom ban wad ia ki lad ki lynti ban tei ia ka Sainik School ha ka jylla bad kala ai khublei ruh ia ka trei shitom jong ka 58 Gorkha Training Centre bad Assam Regiment Centre ban pynthikna ba ki shipai kiba la shongthait kin ioh iaka bai bam tymmen ka jong ki.
U Colonel Gautam Rai u Director jong ka Rajya Sainik Board Meghalaya ula ong ba ka Rally ha Tura la pynlong da ka jingthmu ban shimkhia ia ki jingeh jong ki shipai kiba la shongthait na ka kam bad ia ki bahaiing bahasem ki jongki kiba sah ha kylleng ka rilum Garo bad ula pynthikna ba kadei ka kamram ka jongu ban ai ka jingkyrshan ia ki shipai kiba la shongthait bad ki bahaiing bahasem khnang ba kin ioh ia ka jingim kaba lait na ki jingeh.
Ha kane ka rally la wan ban iashimbynta da ki shipai kiba la shongthait, ki kurim jong ki shipai kiba la khlad noh bad la buh ruh ia ki Unit Run Canteen Counter, Medical Camp bad Grievance Cells da ka Ex-Servicemen Contributory Health Scheme (ECHS), Zilla Sainik Board (ZSB) bad ICICI.
Nalor kane la phaikhmat ruh ha kaba iadei bad ka bai bam tymmen bad SPARSH (System for Pension Administration (Raksha) bad la ai jingbatai bniah ruh ha kaba iadei bad ka ECHS, Army Welfare and Education Society (AWES) bad kiwei kiwei.
