Shillong, Jymmang 12 : Ka Deputy Commissioner ka East Khasi Hills Kong RM Kurbah ha ka sngi Nyngkong, kala pynshlur ia ki samla ka Jylla ba kin rungkam shipai ka Ri India bad pynbna ruh ia ka jingsdang jong ka free coaching camp ka ban iarap ia ki (samla) ba kin pass ia ki test bapher bapher.
Haba kren sha ki lad pathai khubor, ka kong Kurbah kala ong “Ngi kwah ban pynshlur ia kham bun ki samla ba kin rung sha ka kam shipai ka Ri India. Ngi kyrpad ia ki ba kin register bad ka Ophis jong ngi namar ngin sa pynlong ia ka free coaching camp ba 30 haduh 45 sngi”.
Kat kum ka jingong jong ka, ka Ophis ka DC kala iohpdiang ia ki aplikeshon na ki 40 ngut ki samla kiba kwah ban wan sha kane ka coaching camp.
U ADC Shanborlang Warjri ula ong ba ka jingthmu jong ki bor District ban ai ia kane ka pre-recruitment cum training ka long eh ban pynkotbor ia ki samla kiba iakhun ia ka Common Entrance Exam (CEE) ban sa wan, ba kin don ia ki jingtip, ki sap bad ka rukom iakhun ia ka eksam.
“Ki samla jong ngi ki dei kiba biang ha ka met ka phad-ki lah beit ban pass ia ka physical fitness-hynrei ban pass ia ka eksam, bun na ki samla khamtam kiba na jaka nongkyndong kim don satia ia ki jingtip lane kumno ban iakhun-kumta lyngba kane ka prokram, ngin sa ai ia ki jinghikai bad ai ruh ia ki syllabus na ka bynta ka eksam bad ngin sa iarap ruh ia ki ba kin jubab ia ki jingkylli jong ki eksam bala dep khnang ba kin tip ia ki syllabus bad tip kumno ruh ban jubab naba kane kan iarap ba kin ioh ia ka percentage kaba heh” ula ong.
Ula pyntip ruh “Ha u 2023 haba ngi sdang pyntreikam ia ka free coaching programme, ngi la jied ia ki samla bad ai jinghikai kumba 200 ngut bad na kine, 82 ngut kila pass ia ka CEE tang namar ka jingioh ia ka jingpyni lynti kaba dei. Khatduh, 35 na ka 82 ngut kila ioh ia ka kam bad pass ia ka physical fitness eksam”.
“Ngi kwah ban pynshlur ia ki ba kin wan sha ka Ophis ka DC ha ka kamra no 319, ngi kyntu ia ki ban wan hashuwa ka 15 tarik Jymmang khnang ba ngin lah ban btin lynti ia ki bad lah ban btin ha ka lynti kaba dei khnang ba kin pass ia ka CEE ka ban long ha ka taiew ba khatduh u bnai Jylliew lane ka taiew ba nyngkong u Naitung. Ka jingai jinghikai kan long 30 haduh 45 sngi bad hapdeng kane ka por, kin sa ioh ia ki jingiarap kat kaba ki donkam ban pynthikna ba kin pass ia ka eksam (bad CEE bad Physical fitness)” ula bynrap.
 ba kin pass ia ki test bapher bapher.){kind=link}