Tura, Kyllalyngkot 15: Ka President ka Ri India Droupadi Murmu hynne ka sngi nyngkong kala plie pyrda iaka 5th Meghalaya Games kaba la long ha PA Sangma Stadium, Tura hynrei ha kane ka jingplie ia kane ka lympung ialehkai, kala leh ia kaei kaei kaba ym shim la poi pyrkhat kaba la pynlyngngoh ia baroh.
Hadien ba ka President Murmu kala dep ban ai iaka jingkren bad kala shong hala ka jaka shong, u nongkren ne emcee ha katei ka jingialang ula pynbna bala plie iaka lympung iakob ialehkai bad la pynher iaka lama jong ka ri bad la pyllait ruh ia ki balloon. Katba baroh ki dang ang ban peitkai ia ki balloon kiba her shalor suiñ, u nongpynbna ula kren ban pynmeh ia u Microphone bad baroh kila lyngngoh lut halor katei ka jingjia bad sakhi ba ka President kala ieng biang halor ka rynsan.
Ha ka jingplie ia katei ka lympung ialehkai, kala ioh jingtip shaphang ki kynhun tynrai bad ki nongialehkai kiba ieng hapoh ka madan ialehkai haduh 3-4 kynta. Wat hapdeng ka jingkhriat jong ka janmiet, kiba bun ki kynhun tynrai kim shym la phong ia ki jain syaid katba ki nongialehkai kila phong ia ki jain ialehkai, hynrei ym shim la don kiba ud iaka jingkhriat ne ka jingslem bad kila ieng beit ha ki jaka ki jongki haduh ban da kiut ka prokram.
Haba iohi ia kane,ka President Murmu kala leit phai biang sha ka rynsan ban ai khublei ia ki samla shynrang bad kynthei kiba mihkhmat ia ki 3 tylli ki jaidbynriew jong ka jylla kiba la ieng hadpeng ka jingkhriat jong ka janmiet haduh 3-4 kynta ban iashimbynta ha ka shad tynrai ha ka jingplie ia katei ka lympung iakob. Kala ong ba kane ka dei ka mynsiem jong ki nongialehkai, ki khlur kiba dang samla, ka snam kaba dang samla bad ka mynsiem kaba dang lung.
Kaei kaba ka President Murmu kala leh kala long kaba ym shim la poi pyrkhat, namar ka jingkren, ka por bad ka rukom long rukom man ka long kaba khim bha hynrei kala pyni ia ka mynsiem jong ka President kaba long ka riewlum kaba nyngkong duh kum ka President jong ka ri.
Watla kane ka jingleh ka long kaba rit na ka liang ka jongka hynrei kala jop pat ia ka mynsiem jong ki hajar ngut ki nongshong shnong ka thain shatei lam mihngi, kaba dei ka thain kaba bun tam ki riewlum.
