Shillong, Risaw 06 : U Myntri Sorkar Bah Paul Lyngdoh ha ka sngi Thohdieng, ula pyntip ba ka rai ban buh ia ki Central Reserve Police Force (CRPF) kum ka ‘bor pahara bym noh tarajur’ kan long tang ha ki jaka ba jur ka jingiakynad kaba la pynmih ia ka huri hura lane ba lah ban mih huri hura.
Haba iakren bad ki nongthoh khubor, u Myntri ula pyntip ba ia ki CRPF yn ym buh satia ha Langpih Sector namar kam shym la paw satia ba kan don kano kano ka jingkulmar ne huri hura.
“Ia mynta, ki khubor kila mih na Langpih ba kam don dak eiei ban don ka jingiahuri hura ne kulmar, kumta kine ki bor pahara kin don beit tang ha ki jaka ba jur ka jingiakynad kiba la pynmih ia ka huri hura lane ba lah ban mih ka huri hura” ong u Bah Paul.
Haba kynthoh ia ka jingpyrshah ka FKJGP ban buh ia ki CRPF ha ki jaka iakajia pud, u Bah Paul ula ong ba ka jingpyrshah kan don beit wat lada ngi phah iano iano ruh. Ula bynrap ba lad aka Meghalaya ka phah ia ki Pulit, ka Assam kan pyrshah bad lad aka Assam ka phah pulit, ka Meghalaya kan pyrshah. Lada ngi phah ia ki bor pahara ka Sorkar pdeng, ki sengbhalang kin pyrshah.
“….lada ngim phah iano iano ruh, phin pyrshah, kumta ia no ngin phah? Ngim lah ban shu ieh ia kine ki jaka kumba ki long, ieh ban nym don ba peit ne pahara namar ba phi pyrshah ia ka Meghalaya Police, Assam Police, Paramiliary…baroh khoit” ula bynrap
Hynrei, u Myntri ula pynpaw ia ka jingkyrmen ba shisien bala dep ban iasoi ia ka Memorandum of Understanding (Mou) ba khatduh da ki ar Jylla-Assam bad Meghalaya, ka jingiakajia pud kan dei ka kam jong ka mynnor.
Lah ban kdew, ka Meghalaya bad Assam kila rai ban buh noh da ki CRPF ban pahara ha ki jaka khappud ba don ki jingiakajia pud hadien ka jingmih ka huri hura hapdeng ki nongshongshnong ka thain Khappud khamtam ha Khanduli-Psiar.
Ia kane la rai da ka jingialang jong ki Myntri Rangbah ka Assam bad Meghalaya kaba long myn ha ka 30 tarik Nailur ha Guwahati.
