Shillong, Risaw 06 : Ka Sorkar India kala mang ban pynkha thymmai sa 266 tylli ki Anganwadi Centre bad ban kyntiew kyrdan ia ki 1266 tylli ki Aganwadi mini centre sha ki main centre hapoh ka Jylla Meghalaya.
Haba pyntip ia kane, u Myntri ka Tnad Social Welfare Bah Paul Lyngdoh hynne ka sngi Thohdieng, ula ong ba ka jingpyn trei ia kine ki Anganwadi Centre kan sa sdang noh hadien kane ka lyiur bad ka pisa kan long 90% na ka Sorkar Pdeng bad 10 % naka Jylla.
U Myntri ula pyntip ba kawei kawei na kine ki centre ba pynkiew kyrdan kin ioh ia arngut ki nongtrei bad ki nongiarap (helpers) bad kan don ruh ka jingpynkiew ia ka honourarium n aka T. 3500 sha ka T. 4500 shibnai ia ki nongtrei.
U Myntri ula pyntip ba ka jingdonkam pisa baroh lang kala kot T. 826.38 lak bad na kane T. 743.74 lak ka dei ka bhah jong ka Sorkar Pdeng.
Haba kren halor ki 266 tylli ki Anganwadi Centre ba thymmai, ula ong ba kane kan kynthup ruh ia ka jingthung ia ki 266 ngut ki Anganwadi workers bad 266 ngut ki helpers.
