Tura, K’lyngkot 16 : Hadien ka jingsaphriang ki video ba kynnoh ba baroh ki nongialehkai jong ka 5th Meghalaya Games kila ioh tang da ki jingbam dihsha baroh shisngi ha ka sngi plie ia ka lympung hynnin ka sngi Nyngkong, u Myntri kam ialehkai Bah Shakliar Warjri ula pynshai ba baroh ki Nongialehkai kila ioh lut iaka jingbam ba pynkdang kpoh.
Hynrei ula ong, ka jingtreikam jong ki kyndon VVIP ba wan ka President ka Ri, ka jingbam bala shet ia ki nongialehkai kala poi slem sha madan.
Haba iakren bad ki nongthoh khubor ha Tura, u Myntri ula batai “Ngi la pynkhreh bam ia baroh ki nongialehkai naka jaka shet ban wanrah sha madan hynrei namar ka jingkhang iaid ki kali ba wan ka President, ka kali ba kit jingbam kala sahkut ha lynti bad poi slem sha madan”.
U Myntri ula bynrap ba baroh ki Nongialehkai kila ioh ia ka jingbam ba pynkdang kpoh hadien bad ruh ha ka por mynmiet.
Halor kawei pat ka video ba pyni ba ki nongialehkai ki hap ban iaid kjat na PA Sangma Stadium sha ka jaka sah, u Myntri ula ong ba kane ruh ka dei namar ka kyndon VVIP ha kaba ki kali kila hap ban pynieng sha kiwei pat ki jaka bad ki nongia lehkai kim shym la tip ia ka jaka pynieng bala pynbeit.
Hynrei, u Myntrei ula kular ba kum kine ki jingjia kin ym jia shuh. U pyntip ba u Myntri Rangbah ka Jylla Conrad K Sangma, ula lum ruh ia ka jingialang bad ki bor pyniaid ban pynbeit ia kine kiei kiei baroh.
U pyntip ba u CM ula bthah ia ki nongpyniaid ba kin pynthikna ba kam dei ban don ka jingduna ha ka rukom ai jingbam bad ka leit ka wan jong ki nongialehkai khnang ba ka lympung kan long kaba iaid beit iaid ryntih.
Lah ban kdew, ka President Droupadi Murmu kala plie pyrda ia ka 5th Meghalaya Games ha Tura hynnin ka janmiet sngi Nyngkong.
Ha ka por ba ka kren, kala pynpaw ruh ba ka don jingtip ba ki kynhun cultural troupe bad ki nongialehkai kila ap ia ka palat ia ka 3 kynta khlem ki jain syaid bad ai khublei bad jingiaroh ia ki.
