Shillong, Nailur 07: U Myntri Rangbah ka Jylla Conrad Kongkal Sangma hynne ka sngi Balang ula ong ba ka skhim Farmer’s Collectivisation for Upscaling Production and Marketing Systems (FOCUS) ka dei kaba la bei tyngka pura da ka Sorkar Meghalaya Democratic Alliance (MDA) ym ka Sorkar Pdeng.
U Conrad ula kynthoh ia kane halor ka jingkynnoh ka Liang Pyrshah All India Trinamool Congress (AITCC) ba ka skhim FOCUS ka dei kaba la bei tyngka da ka Sorkar Pdeng ym ka Sorkar MDA.
“Ngam tharai ba kan don kano kano ka FOCUS Programme ha ka Sorkar kaba rim bad lada don kino kino kiba pyrshang ban ong ba ngi bud kylliang khamtam halor ka FOCUS Programme ka dei kaba bakla lut” ong u Conrad haba iakren bad ki nongthoh khubor.
U Conrad u ong baka FOCUS ka dei ka flagship programme jong ka Sorkar MDA ban thaw ia ki kynhun jong ki Nongrep bad ka dei kawei na ki kam ki bym pat ju jia mynno mynno ruh ha ka histori jong ka Jylla Meghalaya.
“Kane ka dei ka prokram kaba heh tam kaba la wanrah da ka Sorkar Jylla bad ka jingbei tyngka ia kane ka long beit na ka Sorkar Jylla….ngim shym la ioh pisa na ka Sorkar Pdeng ne nangno nangno ruh” ula ong.
“Kane ka dei ka song pisa bala pynmih da ka Sorkar Jylla la ka dei na ka song jingiarap ba wan nabar ka Ri ne na ki khajna lajong la ka dei na ka bhah khajna ba ioh na ka Sorkar Pdeng ne ka GST bad kiwei kiwei kiba ngi ioh. Hynrei ka mat hi ka long ba kane ka prokram ka dei kaba la wanrah da kane ka Sorkar” ula ong.
