Shillong, Naitung 26: Ka Meghalaya Public Service Commission (MPSC) ha ka sngi Thohdieng kala ong ba ka jingkynnoh ba ka don ka jied bahaiing ne briew ba don jingiadei bad ka jingiaid lait na ka rukom pynlong ia ki eksamin ha ka eksam MCS ki long ki bym don nongrim.
Ha ka kyrwoh khubor, ka MPSC kala ong, hadien ba la dep ban pynbna bad pyntip ia ka result jong ka additional list jong ki 62 ngut ki kyrtong kiba biang ban iakhun ia ki eksamin MCS (Mains), la kynnoh ia ka Commission da ki jingkynnoh ba ka don ka jingjied bahaiing ne briew ba don jingiadei bad kumta ter ter.
Ka Commission ka kwah ban pynshai ba ka la pynneh ia ka jingpynlong iaka eksam kaba shai bad kaba khuid ha ka kyrdan kaba ha khlieh duh.
Kala ong ba ka la shim ia baroh ki lad ki lynti ban pynthikna ba ki jingkylli ba la buh da u Question Setter/ Examiner kin long kiba lait na ki jingbakla. Hynrei wat hapdeng kine ki jingphikir bad jingshimkhia, ki jingbakla ki ju jia hi hateng hateng. Kum kine ki ju jia ha kiba bun ki eksamin pynrung kam ba hakhlieh duh jongka Ri.
Ka MPSC kala pyntip ba hadien ka jingpynbna ia ka Result jong ka MCS Preliminary Examination, uwei u nongujor ula ai da ka dorkhas sha ka Commission ha ka 25 tarik u Kyllalyngkot 2024 ba pan ia ka Answer Key na ka bynta katei ka eksamin kaba la kdew bad la ai ia ka jubab sha u nongmudui ha ka 6 tarik u Rymphang 2024.
Utei u nongujor ula ai ia ka jingthoh sha ka Commission ha kaba ula ong, ba ka Official Answer Key jong ki 3(lai) tylli ki jingkylli ka long kaba bakla. Ula aiti ia ka dorkhas jong u ryngkat bad ki kot ki sla ha ka 9 tarik u Rymphang, 2024 ban kyrshan ia ka jingdawa jong u.
“U riewshemphang (expert) hadien ba ula bishar bniah ïa ki jingkylli bad ki jubab, ula mynjur ba ki don ki jingbakla. Ka Commission kala shimkhia bha ïa kane ka kam bad kala rai ban kohnguh na ka bynta ban bishar bniah biang ïa ki OMR sheet tang na ka bynta kita ki lai tylli ki jingkylli,” kala ong.
“Lah ban kdew hangne ba: (i) ki 3 (lai) tylli ki jingkylli ki kit 2 (ar) marks kawei kawei, kaba pynlong baroh 6 marks. Lada u/ka ki ioh ia baroh lai tylli ki jubab kiba dei u/ka ki ioh hynriew marks. Ia ka jingbishar biang la leh tang na ka bynta ki lai tylli ki jingkylli kiba la pyrshah bad ia ka sla OMR baroh kawei ym shym la bishar biang. Ki Cut Off Marks na ka bynta ki ‘Category’ bapher na ka bynta ka MCS Preliminary Examination kumba la pynbna ha ka 15 tarik u Nohprah 2023 lyngba ka Notification No. OST/SC = 86,” la ong ka khubor.
Ka MPSC ka la ong ba kito kiba iakhun iaka eksamin hadien ba la bishar bniah biang ia ki 3 tylli ki jingkylli kiba ki marks jongki ki long katkum ka cut-off mark bad shaneng la khein ba ki dei hok bad la pynrung ha ka Additional List. Baroh ki kyrtong kiba la biang bad la pynrung ha ka Additional List ki long 62 ngut.
Ka Commission kala shimkhia ban pynthikna ia ka jinglong khuid bad ban leh hok ia ka jingujor namar ba ka Answer Key ba thikna kala bakla bad la rai ban ailad ia u bad ia kiwei pat ki bym shym la ujor.
“Kumba la kdew ha ka jingpynbna, ha ka jaka ban ai jingpyllait tang ïa u nongmudui, la pyntreikam ïa ka jingai ia ka hok kabaïaryngkat ia baroh 13,451 ngut ki kyrtong [na ka bynta ban bishar biang tang ïa ki 3 (lai) tylli ki jingkylli, ia kaba 62 ngut kiba ialeh ia ka eksamin kila ioh ia ka cut-off, nalor ki 580 ngut kiba ialeh ia ka eksam kiba don ha ka thup ba nyngkong, la pynbna ba kila biang ban ialeh ia ka eksamin MCS (Mains). Kumta ki jingkynnoh ba ka don ka jingleh shiliang khmat, ka jingshah liang bad ka jingleh lyndet na ka rukom pynlong ïa ki eksamin ki long ki bym don nongrim,” kala pynkut.
 ha ka sngi Thohdieng kala ong ba ka jingkynnoh ba ka don ka jied bahaiing ne briew ba don jingiadei bad ka jingiaid lait na ka rukom pynlong ia ki eksamin ha ka eksam MCS ki long ki bym don nongrim.){kind=link}