Shillong, Naitung 02 : Ka Tnad ka Koit ka Khiah ha ka sngi U Blei, kala pynshai ba ki dawai kiba la bret sha Marten ha ka 29 tarik Jylliew, ki dei kiba la kut ka por treikam bad ka jingkut por ka dei namar ka jingbym lah pyndonkam ha ka por ba dang jur ka jingpang Covid-19.
Kane ka jingpynshai kala mih halor ka jingmih khubor ba ka Tnad ka Koit ka khiah kala bret kai ia ki dawai ba shongdor da ki klur tyngka sha Marten, kaba la jia ha ka 29 tarik u Jylliew.
Ha ka kyrwoh, u DHS (MI) ula pyntip ba ki dawai ba bret sha Marten, Mawiong ki dei kiba la kut ka por treikam. Ia kine ki dawai la phah wanrah kat kum ki jingdawa jong ki District bad ki jaka sumar kiba don hapoh ka Jylla.
Ia kine ki dawai la thied bad la sam sha baroh ki District bad ki jaka sumar ka Sorkar. Ki don ruh ki dawai bala buh ha ka Central Medical Store ban pynpoi sha ki jaka sumar haba donkam kyrkieh ia ki.
Hynrei namar ka jingwan lynshop ka khlam Covid-19, kine ki dawai kila sahkut ha Central Medical Store namar ba kam don satia ka jingdawa dawai na ki jaka sumar.
“Kine ki dawai bala kut por ki dei ia kaban hap bret namar ki bam kai ia ka jaka bad pynkhapngiah ia ka jaka ban buh ia kiwei ki dawai ba dang wanrah thymmai” ong ka kyrwoh.
Halor kane, u Pharmacist in-charge, Central Medical Store jong ka Directorate ula pyntip kat kum ka shithi ba 27 tarik Jymmang, 2023 ban bret noh ia kine ki dawai bala kut ka por treikam kham kloi kat kaba lah, la pyntip.
La iathuh ruh ba u Assistant Drugs Controller, ka DHS(MI) lyngba ka shithi ba 19 tarik Jylliew, 2023 ula aiktien sha u Pharmacist in-charge ka Central Medical Store ban bret noh ia kine ki dawai da ka jingaibor.
U Pharmacist in-charge ula aiktien sha ki bor ba dei khmih ba kin bret noh ia kine ki dawai ia kaba la leh ha ka 29 tarik Jylliew.
Pule lang ia kane: Manipur: Weng noh ka UPF, KNO iaka pakhang surok ha Kangai
