Shillong, Naiwieng 29 : Ka North East Petroleum Mazdoor Union (NEPMU) kala rai ban pynsangeh noh ia ka jingthmu iakhih da kaba sangeh pynpoi ia ka petrol/diesel sha Meghalaya hadien ba shong jingialang bad ki Heh Sorkar ka Jylla.
Kane ka jingialang kala long ha Nongpoh, Ri-Bhoi District namar ki Nongmihkhmat ka NEPMU kila kyntait ban wan sha Shillong ban iashong jingialang da kaba pynpaw ia ka jingsheptieng.
Ka NEPMU kala rai ban pynsaneh noh ia ka jingpynoi petrol/diesel jong ka IOCL, BPCL bad HPCL sha Meghalaya naduh ka 29 tarik Naiwieng, 2023, halor ka jingkynnoh ba ki Pulit ka Jylla kila lehtohmet bad thombor ia ki nongniah kali kit umphniang ha Ri-Bhoi District naduh ka 24 tarik Naiwieng halor ka nongrim ba don ka jingkhaii tuh.
La kynnoh ruh ba ki nongniah bad nongbud jong ki kali kit umphniang kila shah ktah kti ha ki Pulit. Namar kane, ka Union kala pyntip ba ki nongniah kali kit umphniang kila sheptieng ban wan sha Meghalaya khamtam ha ri-lum Khasi.
Haba kren bad ki Nongthoh Khubor, u Praveen Bakshi, Commissioner Secretary ka tnad Food Civil Supplies and Consumers u la pyntip, ka sorkar jylla Meghalaya kala khot ia kane ka jingialang halor ka rai iakhih ki Mazdoor Union da kaba sangeh pynpoi umphniang kali sha Meghalaya.
“Ngi la iakren sani bha ia kane ka kam bad ka jingeh bala pynpaw da ka Union….Ka jingialang kala shim lang ia ka rai ba kan nym don shuh ka jingpynsangeh pynpoi ia ka umphniang sha ka Jylla” ula ong.
Halor ka jingdawa ka NEPMU ia ki hok ki nongniah bad nongbud jong ki kali kit umphniang ba dei ban ioh na ka sorkar jylla ne na ki kompani, ula iathuh ba ka jingialang kala shim ia ka rai ban pynsngew ia kane sha ki bor ba halor jong ka Sorkar Jylla.
Ha kaba ia dei pat bad ka jingshah kem jong kito kiba donkti ha kaban tuh ia ka umphniang ha shilynter jong u surok bah NH-6, u Commissioner Secretary u la ong, ba kane ka dei ka kamram jong ki pulit ban tohkit bad ka jingtohkit ka la nang iaid shakhmat ban wad bniah halor kane ka kam tuh umphniang bad kiba donkti kin sa shah kem katkum ka ain, da kaba bynrap, ba ka ain kan iaid la ka jong ka lynti.
Haba kylli, u Bakshi ula ong ba ka jylla Meghalaya hi ka la long kaba la pynkhreh bad kala pyndap lypa ia ka jingdonkam jong ka umphniang, petrol, diesel bad ka LPG gas bad ki paidbah kim donkam ban khih khuslai than ia kane ka khubor ba pynbna pynsangeh pynpoi umphniang namar ia kane ka kam la dep ban pynbeit bad la rai ban nym don shuh ka jingpynsangeh pynpoi umphniang sha ka jylla Meghalaya.
Na ka liang u Ramen Das, Secretary ka North East Petroleum Mazdoor Union, u la iathuh, ba ka kynhun ka dap da ka jing lyngngoh halor ka khubor ba la bna paidbah halor ka jingthmu pynsangeh pynpoi umphniang sha ka jylla Meghalaya, namar kane ka dei tang ka shithi ba la thoh sha ka sorkar jylla Meghalaya ban sngap ia ka jingdawa jong ka Union hynrei kam dei ka jingpynbna paidbah ban pynsangeh ia ka jingpynpoi umphniang.
U la iathuh ruh, ba dei hadien kane ka jingialang bad ki bor ka sorkar jylla Meghalaya ha ryngkat ki trai kompani bad ki trai petrol pump, ba la ioh ia ka rai kaba sngewtynnad halor ki jingdonkam baroh, ha kaba kum ka Union hi kan leit sha nongbah Guwahati ban pyntip pat halor kane ka rai.
“Ngi pynbna paidbah syndon ba kam don satia kano kano ka jingthmu ban pynsangeh pynpoi umphniang sha ka jylla Meghalaya, namar ngi ai ka jingiatreilang bad ki paidbah ka jylla Meghalaya bad ngi donkam ia ka jingiatreilang markylliang” ong u Ramen Das.
