Shillong, Naiwieng 29 : Ka All Khasi Meghalaya Tourist Association (AKMT) kala dawa na ka Sorkar Jylla ba kan thaw noh da ka policy ka ban khanglad ia ki kali tourist nabar ka Jylla ba kin leit rung sha ki jaka jngohkai pyrthei ha Jylla.
Ka AKMT kala buh ia kane ka jingdawa hakhmat u Myntri ka kam shang sawari Bah Paul Lyngdoh ha ka jingiakynduh hynne ka sngi Balang.
Haba kren sha ki lad pathai khubor, u President ka AKMT Bah Ricaldinus Dohling ula ong ba ki kali na bar Jylla kum na Assam ki wan poi daki phew tylli shaki jaka jngohkai ka Ri-lum Khasi Jaintia bad kane kala pynduhnong bha iaki nongniah kali trai jylla kiba kamai daka ba ialam iaki briew nabar Jylla sha ki jaka jngohkai.
U Bah Ricaldinus ula iathuh b aka AKMT ka kyntu ia u Myntri ka tnat shang sawari ban thaw lad lynti thaw lynti ha ka ban pynbiang noh da ki jaka ieng ia ki kali kamai tourist kiba wan nabar Jylla khnang ban ailad iaki kali napoh ka Jylla ban ialam iaki nongwan shangkai pyrthei ha ki jaka jngohkai jong ka Meghalaya, kum sha Sohra bad Dawki.
“Kane ka jingdawa jong ngi ban don noh daka jaka ban pynieng iaki kali kamai na bar Jylla, kum ha ISBT Mawiong bad sha kiwei ki jaka, kam mut ba ngi khang iaki ban wan sha Meghalaya hynrei kadei ban ailad iaki dribar trai Jylla ban im ka kamai daka ba kit bad ialam kai iaki nongwan shangkai pyrthei sha ki jaka jngohkai hapoh ka Jylla” ong u Bah Ricaldinus.
U Bah Ricaldinus ula kam ba daki phew tylli ki Bos na Assam jan man ka sngi Saitjain ki poi sha ki thain Sohra bad Dawki bad kane nalor ba ka pynduhnong iaki dribar trai Jylla, ka pynkhapniah ruh iaka surok khamtam ha nongbah Shillong.
U Bah Ricaldinus ula iathuh baka seng ka kyntu ruh ia u Myntri ban tuklar lem halor ka jingshah pyndik ki dribar trai Jylla haki Pulit ka Shillong Traffic Police kiba pynieng iaki kali kamai ha Khyndai Lad.
Haba kylli, u nongialam ka AKMT ula iathuh ba shen ka tnat shang sawari kan sa khot jingialang iaka Company Adani kaba khmih iaki nongwan shangkai pyrthei kiba thmu wan sha Meghalaya lyngba ka Kad Lengsuin Guwahati.
