Shillong, Naitung 13 : Ka Sorkar Jylla hynne ka sngi Palei, kala pynsangeh noh ia ka jingtreikam ki artylli ki hukum ba pyn mih da ka Deputy Commissioner ka East Khasi Hills Kong RM Kurbah, kiba iadei bad ka hukum khang dukan hapoh 10 baje mynmiet ha Nongbah Shillong bad ka jingpyntreikam ia ka Odd/Even Number ia ki kali kamai.
Ka Sorkar kala shim ia kane ka rai ha ka jingialang ki Heh Sorkar (High Level) bala pyniaid da u Symbud Myntri Rangbah ka Jylla ba khmih ia ka Tnad kam pohiing (Police) Bah Prestone Tynsong, kaba la wan iashimbynta da ki Heh Pulit, ki Heh Ophisar bad ka Deputy Commissioner ka East Khasi Hills.
Haba iakren bad ki nongthoh khubor hadien ka jingialang, u Bah Prestone ula pyntip ba ka jingpynjari ia ka kyndon 144 CrPC ha Nongbah Shillong-kaba hukum ia ki dukan/dukan bam bad kiwei kiwei ki dukan die mar ba kin khang noh hapoh ka 10 baje mynmiet, kan ym treikam shuh.
Hynrei ula pyntip pat ba ka jingialang kala rai ba ka jingpynjari ia ka 144 CrPC kan treikam noh tang ha ki lai tylli ki jaka kiba don ha Nongbah Shillong kata ha ka thain Assembly Hotel, City Hut Dhaba, Wards Lake, Polo shaduh Urkaliar.
Ula pyntip ba kat kum kane ka jingpynjari ba thymmai, la buh por ba ki dukan ki lah ban plie tad haduh ka por 11:30 baje mynmiet
Lah ban kdew, ka Deputy Commissioner ka East Khasi Hills, dang shen kala pynmih ia ka hukum ba pynjari ia ka kyndon 144 CrPC ba bthah ia baroh ki dukan/dukam bam bad kiwei ki dukan die ba kin khang noh hapoh ka 10 baje. Kala pynksan ruh ia kane da kaba ong ba ka Nongbah Shillong kam long shuh kaba shngain ha ka por mynmiet namar ki kam iashoh iadat ha kylleng ki jaka ka Nongbah.
Kane ka hukum kala mih ruh hadien ka jingiashoh iadat ki arkynhun mamla dang shen ha thain Laitumkhrah, kaba lam sha ka jingshah wiang ding haduh 3 tylli ki kali kynthup ka Gypsy Pulit, kiba pynieng ha Laitumkhrah Police Station.
U Bah Prestone u pyntip ba ka jingialang kala rai ban pynkhlain noh ia ka jingdon jong ki pulit ki ban pahara ha kylleng ki jaka ka nongbah Shillong haba ong ba ka jingpahara kan long noh baroh 24 kynta na ka bynta ban ai jingshngain ia ki paidbah.
Nalor kane, ka jingialang High Level kala shim ruh ia ka rai ban pynsangeh noh ia ka hukum jong ka Deputy Commissioner ba pyntreikam ia ka Odd-Even Number na ka bynta ki kali kamai kiba rung sha ki thain Kashari-Police Bazaar-Motphran.
Kane ka rai jong ka Sorkar kala mih ruh hadien ba ki nongniah taxi kamai kila iakhih paidbah hynne ka sngi ha Barik, hakhmat ka Civil Hospital Shillong, da kaba sangeh kamai, kaba lam sha ka jingdheng kali kaba jur ha Sor.
Ki Pulit Traffic ka East Khasi Hills kila leit ban tuklar ia kane ka jingkah lynti jong ki taxi kamai ha Barik hynrei ki nongniah kali kila pyneh triang haba dawa ba ka Deputy Commissioner ka dei ban weng noh ia ka hukum mardor.
 bala pyniaid da u Symbud Myntri Rangbah ka Jylla ba khmih ia ka Tnad kam pohiing (Police) Bah Prestone Tynsong, kaba la wan iashimbynta da ki Heh Pulit, ki Heh Ophisar bad ka Deputy Commissioner ka East Khasi Hills.){kind=link}