Shillong, Lber 20 : Ka Sorkar Jylla kala bthah ban pynsangeh noh shuwa arbnai ia ka jingdonkam ba hap ban ai injek na ka bynta ka jingai birth certificate (syrnot sngi kha) khnang ban ioh pynrung kyrteng Aadhaar bad pynthikna ia ka jingioh khlem thut ia ki jingmyntoi jong ka Integrated Child Development Services (ICDS) ia baroh ki Khunlung ba dang shu kha.
Ka jingpynbna bala pynmih da u Commissioner & Secretary ka Tnad ka Koit ka Khiah Dr Joram Beda ha ka 18 tarik Lber kala ong ba baroh ki District Registrar of Birth & Death, la bthah ba kin ai beit ia ki syrnot sngi kha sha baroh ki briew ba aplai khlem da khmih ia ka jingai ne pat ai injek ia ki Khunlung.
Ia ka jingai injek lah ban buh jingthoh la ka jong bad sa buddien pat hadien kum shibynta na ka jingleit ai injek kylleng ki jaka hynrei ym dei pat ban pyniasoh sha ka jingai syrnot sngi kha.
Ki Nongtrei ka Tnad ka Koit ka khiah bad ICDS ki dei ban pynbteng ia ka jingialap ai injek ban pynthikna ba baroh ki khunlung kin ioh ia ki injek hapoh ka por kaba biang.
Ia kane ka policy yn sa shong bishar biang haba kut jong kine ki arbnai ban peit ia ka jingtreikam bad ban lah shim rai ruh la yn dang pynbteng ia ka kam lane yn pynkylla, ong ka jingpynbna.
Ia kane ka rai la shim hadien ka jingioh jingtip jong ka Sorkar ba ka don ka kyndon ba hap ban ai injek shuwa ia ki khunlung na ka bynta ban ioh ia ka syrnot sngikha, kaba la lam sha ka jingslem ban pynrung kyrteng ia ki khunlung ba dang kha.
Kum kane ka jingslem, kala lam sha ka jingbym lah jong ki Kmie Kpa ban pynioh Aadhaar iala ki Khun ba dang shu kha ha ka por kaba biang, kaba ktah pat ia ka jingioh jong ki ia ki skhim bapher bapher jong ka Sorkar khamtam ka Integrated Child Development Services (ICDS).
Ka Aadhaar card ka dei kawei na ki kot donkam ba kongsan bha ban ioh ia ki jingmyntoi hapoh ka ICDS, kynthup ia ka Supplementary Nutrition Programme, Healthcare, ka jingai jinghikai dang kloi ia ki Khunlung, kaba lah ban pynduh ia ka hok jong ki khunlung khynnah.
